Tura, Nailar 06:
Kum shi bynta ban khmih bniah ïa ka jingkiew ha ka jingdon ki khynnah kiba pep skul shiteng por ha Ri-lum Garo, la pynlong ïa ka jingïalang ha ryngkat ka jingdonlang u Myntri ka tnad pule-puthi ka Jylla, u Rakkam A. Sangma, ki nonghikai, ki ophisar ka tnad pule-puthi ka Ri-lum Garo bad ka Meghalaya Board of School Education, Tura.
Ïa katei ka jingïalang la pynlong ha Circuit House, Tura ha ka Sngi Saitjaiñ. Ka jingïalang ka la pynleit jingmut halor ki daw kiba synñiang sha ka jingdon jong ki khynnah kiba pep skul shiteng por kumjuh ban shim ki sienjam kiba paka ban pynbha ïa ka jinglong-jingman ka pule-puthi hapoh ka thaiñ.
Na ka liang u Myntri u la ong ba ka jingdon jong ki khynnah kiba pep skul shiteng por ka la kiew ha ka kyrdan pule ‘Primary’ bad ‘Secondary’, ha kawei ka liang kaba wanrah ka jingtynjuh ha ka jingkiew jong ka thaiñ bad bynrap ba dei ban shim ïa ki lad ki lynti kiba manbha ban pynbeit bad ban kyntiew ïa ka jinglong-jingman kaba bit ba biang da kaba pyntikna ïa ka pule-puthi kaba paka sha ki khynnah.
U Myntri u la kdew ruh ba yn pynbit pynbiang ïa baroh ki skul Sorkar bad nonghikai, ha kajuh ka por yn pynbiang ïa ka rukom ai jinghikai kaba ryntih ha ki sngi ban wan khnang ban pyntikna ïa ki lad jingïarap kiba bit ba biang ha ka pule-puthi na bynta ki khynnah bad kyntu ïa ki nonghikai ban shim ka jingkitkhlieh bad ban hikai naduh mynsiem.
Ha katei ka jingïalang, ka la don ruh ka jingïamir jingmut hapdeng u Myntri, nonghikai bad ophisar, ha kaba baroh ki la synñiang la ki buit bad jingai jingmut bad la pynithuh kyllum ïa ki daw kiba la ïalam sha ka jingkiew ha ka jingdon kiba pep skul shiteng por hapoh ka thaiñ.
Ki jingeh ha ka liang ki jingdon-jingem, ka jingkynriah sha ki jaka sor, ka jingdon iwei i nonghikai bad ki nonghikai ki bym pat pyntbit, ki daw ba ïadei bad ka imlang-sahlang bad ka ïoh ka kot, ka jinglong-jingman ka pule-puthi – ki long katto-katne na ki daw kiba pynbor ïa ki khynnah ban ieh noh skul shiteng por.
Haba ai jingkren ha ka jingïalang, ka Principal ka Educere Secondary School, Williamnagar, ka Gamchi T.R. Marak ka la kren halor ki jingkhmih lynti ki ban mih na ki khynnah hadien ka jingpule bad kyrpad ïa ki nonghikai ban pynrung ïa ka mynsiem jong ka jingkitkhlieh bad jingminot, ha kajuh ka por ban kyntiew ïa ka sap bad jingtbit jong ki ban pynbha ïa ka jinglong-jingman ka pule-puthi hapoh ka thaiñ.
Ha kane ka jingïalang, la ïoh ruh ïa ka jingkren bad jingai jingmut na u Executive Chairman, MBOSE, Tura, Ambrose Ch. Marak, Deputy Commissioner, West Garo Hills, Tura, Jagdish Chelani, Chairman, Tura Municipal Board, J.D. Sangma, Additional Deputy Commissioner, WGH, Rezia Ch. Sangma, Principal, Don Bosco College, Rev. Fr. Threnius Sangma, ophisar na ka tnad pule-puthi, MBOSE bad DIET, Tura.
Ka jingpynbha ha ka liang ki jingdon-jingem, ka jingpynbit pynbiang ïa ka ‘Curriculum’, jingai jinghikai ïa ki nonghikai, ka jingpynkhlaiñ ïa ki lad jingkyrshan ki long ki katto-katne ki rai kiba la shim hadien katei ka jingïalang bad u Myntri u la kular ban ai ka jingkyrshan ba pura ban wanrah jingkylla ha ka tnad pule-puthi jong ka thaiñ baroh kawei.
