Shillong, Nailar 06:
Hapdeng ka jinghiran kaba shyrkhei, ki nongtrei ka Meghalaya Energy Corporation Ltd (MeECL) ki kiew tulop man la ka san snem, ym kum ki nongtrei Sorkar kiba kiew tulop man la ka 10 snem.
Ka MeECL wat lada ka dei ka kompani, hynrei ka dei kaba kyrduh pisa bha bad ka hap ban treikam da ka jingkyrshan ka Sorkar Jylla.
Katkum ka tyllong khubor la ong ba ka MeECL ka ju pynkiew tulop shisien san snem ïa ki nongtrei bad ka sien kaba pynkiew tulop ka dei ha u snem 2021.
“Ka jingïoh pisa bad ka jingkynshew pisa ka MeECL ka dei kawei ka jingeh kaba hakhmat eh kumno ban lah ban weng,” la ong ka tyllong khubor.
Haba kren shaphang ka pisa kaba ka MeECL ka dang dei ban ïoh na ki nongpyndonkam bording naduh ki karkhana bad ki paidbah, la ong ba ka pisa kaba dang dei ban ïoh ka la kot kumba T. 650 klur haduh mynta.
“Lada dei ba ka MeECL ka ïoh noh kloi ka pisa kaba sahteng na ka bai thang ding ilektrik, kan long ka jingïarap shibun eh ha ka rukom treikam,” la ong ka tyllong khubor.
Haba kylli kaei ka sienjam ban leh tyngeh ïa ki bym pat siew ïa ka bai thang ding ilektrik, ka tyllong khubor ka la ïathuh ba ka MeECL ka sienjam kaba hakhmat eh ka long ban shu ujor noh da ka ejahar pyrshah ïa kito kiba khlem pat siew bad pynsahteng da ki phew snem ïa ka bai thang ding ilektrik.
