Shillong, Nailar 06:
Ka bynta jong ka surokbah (NH-06) na Lad Umroi shaduh Shillong la shimti noh da ka National Highway Infrastructure Development Corporation Ltd (NHIDCL) na ka National Highway Authority of India (NHAI) na ka bynta ban maramot bad shna thymmai ïa ki bynta jong ka surokbah bad jingkieng lada donkam.
Baroh shikatta ki surokbah ha Meghalaya ki hap ha ka jingpeit jingkhmih ka NHAI.
U Symbud Myntri Rangbah, Bah Prestone Tynsong uba peit ïa ka tnat shna surok ha Jylla u la ong ba naduh ba la shimti ka NHIDCL ïa ka bynta jong ka surokbah na Lad Umroi sha Shillong baroh ki kam kiba dei ban pyntrei ha kane ka bynta jong ka surokbah kin hap ha ka jingpeit ka NHIDCL.
Haba kylli halor ka jingpynkhreh ban tei thymmai ïa ka jingkieng ha ka bynta ba den ïa ka pung Umïam, u Bah Prestone u la ong ba ïa kane ka kam, ka NHIDCL kan sa pynkhreh ïa ki jingdonkam ban tei ïa ka jingkieng kaba thymmai sharum ka pung Umïam.
Da ka jingshimti ka NHIDCL, baroh ki kam naduh ka jingmaramot ïa ka bynta jong kane ka surokbah na Lad Umïam sha Shillong yn hap peit hi lut ka NHIDCL.
Ka bynta ba kongsan eh ha kane ka surokbah ka dei ka jingthmu ban tei thymmai ïa ka jingkieng ha ka jaka ba den ïa ka pung Umïam.
Dang shen la rai ban tei ïa ka jingkieng kaba thymmai kham sharum ka pung Umïam namarba ka jaka ba den ïa ka pung mynta ka dei kaba ym shngaiñ namar ka ïaid ka surok kali nalor jong ka jaka ba den ïa ka pung Umïam.
Kumba ka long mynta, ka jingkieng ka long kaba shngaiñ, hynrei kaba kham hakhmat ban leh ka long ban thep thymmai ïa ki ‘bearing’ kiba pynduna ïa ka jingkyrshut hapdeng ka jingkieng bad ka kynroh ba den ïa ka pung Umïam.
