Shillong, Nailar 06:
Ki nongïalam shnong na ki shnong bapher bapher kiba hap ha ka thaiñ Mawkynrew ki la rai ban ïatreilang ban kyntiew ïa ka kam jngohkai hapoh ka thaiñ bad ki la thaw ruh ïa kawei ka kynhun kaba tip kum ka Mawkynrew Tourism Sociable Society (MTSS).
Ïa ka MTSS la thaw dang shen ha ka jingïadonlang u MLA ka Mawkynrew Bah Banteidor Lyngdoh da ka jingthmu ban kyntiew shuh shuh ïa ki kam jngohkai hapoh ka thaiñ. Ïa kane ka rai la shim ha ka jingïamir jingmut kaba la pynlong ha ïingdorbar shnong Thangsning ha kaba la ïathir kumno ban pynmih pisa, ki lad ïoh kam ïa ki khun samla na ka kam jngohkai pyrthei ha kaba kane ka thaiñ ka la paw bha mynta na ka jingdon ki jaka kiba itynnad bad kiba khring ïa ki nongwan jngohkai na kylleng.
Ka thaiñ Mawkynrew ka don lypa bun tylli ki jaka jngohkai kiba kynthup ïa ka shnong Laitlum kaba la paw bad khring bha ïa ki nongjngohkai, Umtong, Syntung, Khlieh-A-Sem, Nongjrong bad kiwei kiwei ki jaka.
Kine ki jaka jngohkai ki la khring ïa ki phew hajar ngut ki nongjngohkai man la u snem. Kumta ki nongïalam shnong lem bad u MLA ki la sngewdei ban don ka rukom treikam ban ai jingmyntoi ïa ki shnong kiba don ki jaka jngohkai bapher bapher.
U MLA haba kren ha kane ka jingïalang u la ong ba ka kam jngohkai ka dei kawei kaba kongsan bha ka ban long ka lad pynmih pisa ïa ki dorbar shnong bad ka lad ïoh kam ïa ki khun samla ha ka thaiñ. “Ngi hap ban ïatreilang bad kumta ka jingthaw ïa ka Society kan dei na ka bynta ban ïa kyntiew lang ha baroh ki liang”, u la ong.
“Ki jaka jngohkai ki dei ka spah bah ïa ka thaiñ bad nga kyntu ban ïa long kiba sumar khuid ïa ki jingitynnad ba ka Mei Mariang ka ai naduh ki wah, ki khlaw, ki kshaid, ki lum, ki mrad khlaw bad ki sim ki doh”, u la ong. “Ngin ïathir bun ki kam ynda ka Society ka la shong jingïalang”, u la ong
Da kaba pynpaw ba lyngba ka Society yn ïoh lad ban ïakren bad ki bor Sorkar ban phai khmat sha ki jaka jngohkai da kaba thawlad ban ïoh jingïarap ban shna pynbha bad pynitynnad ïa ki, u Bah Banteidor u la ong ki khun samla kiba la bit la biang ka kyrdan pule ki dei ban mih shakhmat ban trei ban ïeng ha la ki kjat.
U la ong ba ka Society kan ïaleh ban pynpaw pyrthei ïa ki jaka jngohkai ha kane ka thaiñ da kaba buh ïa ka jaka pdeng (Centre) ha ki bynta ban rung sha u pud u sam ka thaiñ Mawkynrew bad ïoh pat ban ïalam ïa ki nongjngoh kai ha ryngkat ka jingshngaiñ.
Ka jingïalang ka la pynskhem ïa u Bah Banteidor Lyngdoh kum u President kane ka Society, u Bah Traibor Nongkhlaw bad u Bah Pynshaibor Synjri kum ki Vice President, u Bah Olet Kharsahnoh kum u Secretary nalor kiwei kiwei pat.
Ha kane ka sngi, u MLA u la sam ruh ïa ki jingkup ban da na u slap, sha ki palat sanphew ngut ki nongshong shnong kiba im jakpoh da kaba die jingdie sha ki nongwan jngohkai ha Laitlum, ki nongkdew lynti ïa ki nongjngohkai (tourist guide) nalor kiwei pat khnang ba ka kam jong ki kan nym thut wat haba jur u slap.
