Imphal, Nailar 06:
Ki pulit ka Manipur ha ka Sngi Saitjaiñ ki la pyntip ba ki la ïoh kurup biang ïa 1,195 tylli ki tiar siat bad 14,322 tylli ki kuli bapher-bapher kiba la shah tuh ha ki ’riew paidbah na kylleng ka jylla.
Ha u kyrwoh khubor, ki pulit ki la pyntip ba haduh ka Sngi Saitjaiñ, na kitei ki 1,195 tylli ki tiar siat ba la ïoh kurup biang, 1,057 tylli ki dei na ki distrik kiba don ha ka jaka them bad 138 tylli ki distrik kiba don ha ki jaka ba shong ki riewlum.
Ki pulit ki la ïathuh ba kitei ki tiar siat bad kuli ki dei kiba la ïoh ban knieh da ki paidbah na ki thanat bad ki jaka buh tiar siat bad kuli kiba don ha ki distrik ha jaka them bad ha jaka ba sah ki riewlum.
Ha ka 3 tarik Nailar, ki pulit ki la ong ba la ïoh ban kurup 15 tylli ki tiar sia,t katba ha ka Sngi Saitjaiñ ka la don ka jingthmu ban knieh ïa ki tiar siat na ki pulit kiba don ha Toupokpi Police Outpost ha Lilong Chajing, Imphal-West distrik.
Hynrei ki pulit ki la beh thong ïa kita kiba la knieh ïa ki tiar siat bad ki la ïoh ban kurup biang ïa ki saw tylli ki tiar siat. La kem ruh ïa uwei u briew uba la donkti bad la kurup lang sa ïa ka kali ba la pyndonkam da ki runar ha kane ka jingpyrshang ban knieh ïa ki tiar siat.
Nalorkata, ha ka 3 tarik Nailar, u paidbhur u la leit khynra ïa ka Keirenphabi Police Outpost, Thangalawai Police Outpost bad ka ktem jong ki pulit ka 2nd Armed Battalion, Naranseina ha Bishnupur distrik bad ki la ïoh kit ïa shibun bah ki tiar siat bad kuli.
Ka la don ruh ka jingpyrshang jong u paidbhur ban knieh ïa ki tiar siat bad suloi na Heingang Police Station bad na ka Singjamei Police Station ha katei hi ka distrik, hynrei ki pulit ki la lah ban ïakhun pyrshah ïa u paidbhur.
