Shillong, Nailar 06:
Ki samla na Manipur kiba la wan ban ïashim bynta ha ka ‘Peace Rally’ kaba la pynlong da ka Catholic Association of Shillong (CAS) ha ka Sngi Saitjaiñ ki la pynpaw ïa ka jingsngewsih kthang halor ka jingïakynad jaidbynriew kaba la neh ha ka Jylla jong ki la palat lai bnai mynta.
“Ka long kaba sngewsih ba kane ka la wan jia ha ngi. Kane ka dei kaba la pynwandur da u Myntri Rangbah, u N. Biren Singh. U la ai lad ïa ka Arambai Tenggol bad ka Meitei Leepun ban thombor ïa ki ’riewlum. Ngim don jaka ban leit shano-shano bad ngi la shu phet kulmar sha kiwei-kiwei ki Jylla,” la ong kawei ka samla ba la wan sha ka ‘Peace Rally’.
Katei ka samla kaba la pyndep ïa ka jingpule Master’s Degree ka la ïathuh ba kam shym ïoh lad ban leit phai biang sha la ïing (Manipur) namar ka jinglong-jingman bad kumba ka long, ki bahaïing jong ka, ki don ha kiwei-kiwei ki Jylla bad kim lah ban ïakynduh iwei-ïa-iwei.
“Ka Sorkar ka dei ban sngap ïa ka sur jong ngi bad ym ban shah liang. Ka dei ban shimkhia khnang ba baroh kin ïoh ïa ka hok bad ba ngin ïoh leit phai sha ïing da ka jingsuk,” ka la ong.
Sa kawei pat ka samla ka la pynpaw ba watla ka jingïakynad ka la neh la palat lai bnai, hynrei ka Sorkar kam shym la leh eiei haduh mynta.
“Katba ngi hangne, ngi dang ïalum ban kyrpad ba ka jingïakynad kan kut noh, sha la ïing ha Churachandpur, ki dang thombor ïa ki shnong ki thaw jong ngi, ki briew ki dang shah pynïap,” ka la ong.
Haba ïathuh shaphang ki bahaïing hasem kiba don ha Manipur, ka la ong ba ki bahaïing jong ka, ki la hap ban sah lai sngi ha ka jaka sah ba shi por bad la kynnoh ba katba dang ïalam ïa ki sha Kangpokpi, ha ki kali, ki la shah siat ha ki Arambai Tenggol na ki jaka them jong ka Jylla, hynrei donbok ym shym la jia eiei ïa ki.
“Mynta ki la poi suk sha la ïing hynrei ngim tip kaei ban jia namar ka jingthombor ka dang ïai bteng,” ka la ong da kaba bynrap, “Man ka minit, man ka sekhon, ngin ïoh khubor na sha ïing, la kynthoh beiñ da ki kyrteng ba laiphew jait ïa ngi.”
Haba kylli, ka la ong, “Ka jingïaphiah ha ka jinglong-jingman ka jaka ka la dep lypa, lada ngi leit sha ki jaka them, ngin sa shah pynïap. Kum ki nongshong shnong ba don ka jingkitkhlieh ka India, ngi don ka hok ban dawa noh la ka jong ka jingsynshar hapoh ka Riti Synshar ka Ri khnang ba ngin ïoh jingïada.”
Ha kawei ka liang, sa kawei pat ka samla kaba la wan ïashim bynta ha katei ka ‘Peace Rally’ haba kren halor ka jingïakynad jaidbynriew ha ka Jylla lajong, ka la pynpaw ka jingsngewsih kthang bad ong ba ka pang ka mynsiem ban ïohi ïa kiba kum kitei ki jingjia.
“Ngi la ïa im lang da ki spah snem bad ngi im suk im saiñ, ki paralok bad ki para marjan kiba ïasah lang, ïabam lang, ïatreilang…shi sngi mynshuwa, ki thombor ïa ngi ha ka sngi kaba bud. Ngi da kyndit shisha bad ngim sngewthuh kaei kaba jia. Kumno ka jingisih ka lah ban klun sted ïa ki briew?” ka la buh jingkylli.
Ka la ther tyngeh ruh ïa ka ‘Meira Paibis’ ka kynhun seng longkmie ha katei ka Jylla da kaba kynnoh ba ki la kynthoh kylla bad thombor ïa ki ha kiba bun ki liang.
“Watla ngi phai khmat sha ka Sorkar India, hynrei kam leh ïa kaei kaba dei ban leh. Ha ka jingshisha ka la dei ban pyntreikam ïa ka jingsynshar President (President’s Rule),” ka la ong.
Shuh shuh haba jubab ka la ong, “Ka jingïaphiah ha ka jingsynshar ka dei ka jubab lada ki bteng ban thombor ïa ngi. Ym don lad shuh da kumwei pat. Kumno ngin sah lang bad ki briew kiba isih ïa ngi bad mar syn ong ne ki ithuh ba ngi dei ki Kuki, ki pyrshang pynïap ïa ngi. Kumno ngin sah lang bad ki, balei ym phiah noh ïa ka jingsynshar. Kane ka dei ka hok jong ngi.”
