Nongpoh, Nailar 07:
Ka Synjuk Ki Rangbah Shnong jong ka Ri Bhoi District ka la rai ban ujor noh da ka Public Interest Litigation (PIL) ha ïingkashari pyrshah ïa ka sorkar jylla kaba la pynslem ban pyllait ïa ka pisa na ka skhim MGNREGS.
Ïa kane ka rai ban ujor PIL la shim ha ka jingïalang ba la pynlong ha ka sngi Nyngkong ban ïatai halor ki mat kiba kum ki nongïalam shnong ka Ri Bhoi District ki ïakynduh ha kaba ïadei bad ka jingpyntreikam ïa ka skhim jong ka sorkar kmie kaba la tip kyrteng kum ka Mahatma Gandhi National Rural Employment Guarantee Scheme (MGNREGS) namar ka jingpynslem ban pyllait ïa ka pisa ban thied ïa ki tiar ki tar ban pyntreikam ïa katei ka skhim mynta la kumba ar snem lynter.
Ha kane ka jingïalang ba la pynlong ha ka ïingdorbar jong ka shnong Ïewmawlong, la wan ban ïashim bynta da ki nongïalam jong ki Village Employment Council (VEC) kiba hap ha ka Umling bad Jirang C&RD Block.
Haba kren sha ki lad pathai khubor hadien ka jingïalang, u Bah PB Sylliang, General Secretary ka synjuk u la ïathuh ba kane ka jingïalang da kawei ka sur ka la shim ïa ka rai ban ujor noh da ka Public Interest Litigation (PIL) ha ïingkashari pyrshah ïa ka sorkar jylla halor ka jingmynthi ka sorkar ban pyllait ïa ka pisa bai tiar bai tar jong ka skhim MGNREGS kaba la sahkut mynta da ki snem lynter hapoh Ri Bhoi District.
U Bah PB Sylliang u la pyntip ruh kumba ka long mynta, ka sorkar jylla ka la pyllait tang ïa ka pisa nong jong ki nongbylla shispah sngi lane kita ki jobcard holder, katba ïa ka pisa jong ki bai tiar bai tar, la shu pynsahkut mynta la kumba ar snem lynter, kaba la wanrah jingeh shikatdei ïa ki nongïalam shnong bad ruh kaba la pyndkoh ïa ka jingpyntrei ïa katei ka skhim.
Nalor kata, u la ïathuh ba ki don ruh ki VEC kiba khlem pat ïoh ïa ka pisa jong ka Project Management Cost (PMC) kaba dei na ka bynta ka bai leit bai wan jong ki Chairman bad General Secretary mynta la san snem kynthih. Da kane ka jingpynsahteng ban pyllait ïa ka pisa ka la buh ïa ki nongïalam jong ka VEC ha ka jingeh kaba khraw.
Kane ka jingpynslem ban pyllait ïa ka pisa, ka buh jingeh ruh ïa ki nongdie dukan kiba ju pynbiang ïa ki tiar trei sha ki VEC kat haduh ba kim lah shuh ban kyrshan namar ka jingbym ïoh siew pisa ha ka por kaba biang, bad kumba long mynta lei da ki ar snem lynter, la ong u Bah Sylliang.
Shuh shuh halor ka jingbthah jong ka sorkar ban leh ‘online’ ïa ka jingwan (attendance) jong ki nongbylla shispah sngi, ka synjuk ka pynpaw ba bun ki shnong ki shem jingeh shikatdei halor kane ka bynta namar ka jingbym biang jong ka network mobile khamtam sha ki jaka kyndong. Kumta halor kane ka bynta ruh, na ka liang ka synjuk ka dawa ba ka sorkar ka dei ban shimkhia ban pynbiang shwa ïa ki network mobile. Lada kam lah ban leh kumta, ka hap ban leh biang kumba ju leh ha ki por mynshwa kata da kaba leh ‘offline’.
U Bah Sylliang u la ïathuh ruh ba ha kine ki khyndiat sngi ki ban sa wan, na ka liang ka synjuk kan sa leit ruh ban kynduh sa ïa ki nongïalam jong ki VEC kiba hap hapoh ka jingkhmih jong ka Umsning bad Bhoirymbong C&RD Block ban shim lang ïa kajuh ka rai halor kane ka phang.
