Ka Meghalaya Energy Corporation Limited (MeECL) ka ju shah thalaiñ na ka por sha ka por namar ka jingkyrduh pisa kaba ïalam sha ka jingpynduh lad ïa ban thied bording na shabar khnang ban pyndap ïa ka jingdonkam jong ka jylla. Ha ki por bym don slap, ka jingpynlip bording ka long da ki phew kynta ha ka shi sngi bad mynta ka la kham duna namar ka jingïarap jong u slap. Hynrei hapdeng kine kiei-kiei, ki nongtrei ka MeECL ki kiew tulop man la ka san snem bad ym kum ki nongtrei sorkar kiba kiew tulop tang shisien ha ka 10 snem. Ka MeECL, kumba paw naduh ka kyrteng, ka dei ka ‘Corporation’ ne ka kynja kompani kaba heh, hynrei ka rukom treikam jong ka pat, ka kham tlot bad duna ban ïa ki shnat jong ka sorkar kiba malu-mala. Ka jingkhmih lynti ka long ba ka MeECL kan dei ka shlem ka ban lah ban pynmih ka pisa khnang ba kan pyndap pynbiang ïa la ki jingdonkam khlem da peit khmat sha ka sorkar ba kan shim ram na ka bynta jong ka na ka por sha ka por. Hynrei ka long lut da khongpong. Ka sorkar ka la hap ban shu bah-khlieh na ka snem sha ka snem khnang ba ka MeECL kan ïoh shim ïa ka ram ban siew ïa ki ram.
Ka MeECL ka long thik kum ka ïing paki dulan ka bym don eiei shapoh! Shu itynnad bad sngewkhaiñ namar ka dei kata ka ‘Corporation’, phewse ka dei tang ka nongkjit ïa ka pisa paidbah na ka daw jong ka jingbun palat ka ram ba ka hap ban siew da ka jingkyrshan jong ka sorkar. Lada ka sorkar ka shu ieh ïa ka MeECL, kan ym shimpor ïa kane ka kompani ba kan khyllem jraiñ shisien ka sngi. Da pyrkhat ïa kita ki nongtrei ka MeECL, la sngewkhaiñ shisha ba ki shah pynkiew tulop shisien san snem. Lada ngam jylliew pat, kane ka kompani ka la dei shisha kata ka ‘bam hati, kit kulai’. Ka jingïoh kaba tang khyndiat, ka jinglut pat kaba bun shaba palat! Kiba kum kine ki kompani kin ym lah ban shan slem bad kan sa poi ka por ba wat ka sorkar kan hap ban phai da ka lyngkdong. Katno sien yn shu bah khlieh sah ïa ka kompani bam hati, kit kulai? Ka sorkar ruh ka donkam ban pyrkhat sa na ka bynta kiwei ki kam jong ki paidbah.
Nalor ka jingbam hati, kit kulai, ka MeECL ka dang hap ban ïoh sa kumba T. 650 klur na ki nongpyndonkam bording la ki dei ki karkhana ne ki ’riew paidbah. Ka leh aïu ka MeECL ban shim ïa ka pisa jong ka? Ha kine ki snem, ka la don ka jingpynlip bording ha ki shnong ki thaw namar ki katto katne ki longïing ki khlem pat siew ïa ka bai pyndonkam bording. Kane ruh ka long ka lynti kaba bakla – kumno yn pynsaja ïa baroh tang na ka daw jong ki katto katne ngut? Ka dei ka jingbakla ka jong no ba ki karkhana lane ki paidbah ki kyntait ban wan siew? Kata ka T. 650 klur kam dei ka pisa barit namar na kane ka pisa, ka MeECL kan lah ban siew ïa ka ram ba ka la shim lane ban pynbha ïa ka jingtreikam jong ka.
Ngi la ju ïohsngew ïa ki jingïatai hapoh ka Ïingdorbar Thawaiñ halor ka jingbym poi biang por jong ki ‘bill’ sha ki paidbah khamtam sha nongkyndong. Bad lada kita ki ‘bill’ ki poi, kin dei beit na ka bynta bun tylli ki bnai kiba kot sha ki phew hajar tyngka. Kumno ki paidbah kin siew ïa kata ka phew hajar tyngka shisien siew? Hato ka dei ka kamram jong ki paidbah ba kin leit shim hi ïa ki ‘bill’ lane ka dei ka kamram jong ka MeECL ban pynthikna ba ki ‘bill’ kin poi man la u bnai ha man la kawei pa kawei ka thliew ïing? Ka MeECL ka la shah kyntu na ka por sha ka por ba kan pynbeit ïa kane da kaba buh da ki briew na ki shnong ki thaw ki ban peit ïa ki ‘meter’ bad ki ban ai ïa ki ‘bill’. Ha kajuh ka por, ka jingsiew ïa ki ‘bill’ ka dei ban long hapoh shnong bad ki paidbah kim donkam ban leit shaduh sha ki shlem treikam ka MeECL ban siew pisa. Lada leh ha kane ka rukom, ka jingduhnong ka MeECL bad ki paidbah kan duna shibun.
Mynta, ka MeECL ka don jingthmu ban shu ujor noh da ki ejahar pyrshah ïa kito kiba khlem pat siew bad pynsahteng da ki phew snem ïa ka bai thang ding ilektrik. Ngin sa nang ïa peit mano kita ki ban shah ujor bad kaei kaba ka MeECL kan leh hadien ba la ujor. Ka dei ban leit ot shwa ïa ka bording na ki shlem treikam jong ka sorkar bad ki karkhana baroh kiba khlem paw siew ïa ka bai pyndonkam bording baroh shi katta. Lada leh shwa ïa ki ba heh, sa peit ïa ki barit kham hadien. Ha kajuh ka por, ngi sngew kwah ban kyntu ïa ki paidbah ba kin wad noh da kiwei ki lad ki lynti na ka bynta ka bording da kaba pyndonkam noh da ka ‘Solar Energy’ ne ‘Wind Energy’ (jingtan bording na ka Sngi bad Lyer) khnang ba kin ym donkam shuh ban shaniah ha kata ka MeECL. Ha kito kiba kham don kham em, ki don ka lad ban sdang da kine ki rukom. Ha kaba sdang, ka jinglut kan kham bun tangba lada pyrkhat jngai, ka jingshah pynthut ha ka MeECL kan duna. Ngim dei ban shah pynlong langkñia ha ka shlem kaba bam hati, kit kulai, bad ka bym lah ban treikam kum kata ka ‘Corporation’ lane ka kompani, hynrei kaba la shu dap sa tang da ka ram haduh ñiuhmat.
