Shillong, Nailar 07:
Ka jingwan khnang jong ka kynhun tohkit ne Commission of Inquiry sha Shillong ban ïohsngew na ki briew ka Meghalaya haba ïadei bad ka jingjia shah siat ki 6 ngut ha Mukroh ka jaka kaba don khappud ka Meghalaya bad Assam ha u snem ba la dep, ka la shu long lehnohei namar ym don satia mano-mano kiba dei ki sakhi kiba leit ban ai jingbatai hakhmat ka nongbishar kaba la shongthait ka Justice (Retired) Rumi Kumari Phukan ha ka Lah Sngi U Blei ha Assam House ha kane ka nongbah.
Ka Sorkar Assam ka la thaw ïa ka kynhun tohkit kaba khlieh da ka nongbishar ka Gauhati High Court kaba la shongthait ka Justice (Retired), Rumi Kumari Phukan ban tohkit bniah halor ka jingjia shahsiat ïap kaba la jia ha ka 22 tarik Naiwieng, 2022 ha shnong Mukroh kaba hap ha West Jaiñtia Hills district, Meghalaya.
Dang shen, kane ka kynhun tohkit ka la dep pynbna paidbah ba kan sa wan sha Shillong ban pynlong ïa ka jingpynsngew (hearing) na ka bynta kiba na Meghalaya haba ïadei bad katei ka jingjia ha Mukroh namar ka Commission ka la dep ban pynlong ïa ki jingpynsngew bad shim jingtohkit ha Assam.
Hynrei kaba pynlyngngoh ban lap ka long ba ym don satia ki sakhi (witnesses) na Meghalaya kiba wan mih hakhmat ka nongbishar kaba khlieh ïa ka kynhun tohkit ha Assam House, Shillong.
Haba pynpaw ka jingdiaw, kane ka nongbishar ka la ong ba ka long ruh kaba lyngngoh ba wat haba la pyntip paidbah da ka Commission lyngba ki lad pathai khubor, hynrei ym don mano-mano ba wan mih hakhmat ka Commission.
Ka Justice Phukan ka la ïathuh ba ha ka jingshisha, la dep pyntip ruh lyngba ki bor district ka West Jaiñtia Hills bad Secretary ka Sorkar Meghalaya ba kino-kino ki briew, ki sakhi bad kito kiba don jingtip shimet haba ïadei bad ka jingjia ki lah ban wan mih hakhmat ka Commission bad pyni ruh ïa ki sabut ban pynshisha.
Hynrei ym don satia mano-mano ban wan mih la ka dei ki briew na Mukroh, ne ki bor district bad pulit ka West Jaiñtia Hills ne ki briew ka Sorkar Meghalaya ne ki kynhun seng kiba la kren bad byrthen bha ha ka por ba jia ka jingjia ha Mukroh.
Ka kynhun tohkit na Assam ka la dep khmih bniah ban tohkit hapdeng 53 ngut haduh 55 ngut ki sakhi bad la lum ruh ïa ki sabut na ka liang kiba dei na Assam.
Ka Justice Phukan ka la ïathuh ba ha ka jingshisha, ka Sorkar Meghalaya ruh ka la thung ïa ka kynhun tohkit bad ka la dep lum ïa ki sabut jong kiba dei na Assam kiba kynthup ïa ki pulit, ki pulit khlaw bad kiwei kiwei ki briew.
Ka kynhun tohkit na Meghalaya ka dei kaba khlieh da u nongbishar ba la shongthait u Justice (Retired) T. Vaiphei.
“Kiba dei na Assam ki la wan mih sha ka Commission kaba thung da ka Meghalaya hynrei haba ïadei bad ka Commission kaba na Assam, ki briew kiba na Meghalaya ki khlem wan satia ban sakhi bad pyni ki sabut wat haba ngi la bthah ïa ki bor district bad Sorkar Meghalaya ban pyni ïa ki sakhi namar ngim don ka jaka sah bad kyrteng ba tikna jong ki briew lait tang katto-katne ka kur ne jait jong ki,” la ong ka Justice Phukan.
Ka Justice Phukan ka la ong ba ka kwah bha ban ïohsngew na ka liang ki briew ka Meghalaya halor ka jingjia bad ba kin pyni ki kot ki sla bad sabut, tangba ki khlem wan satia.
Kumta ka la ong ba ka Commission kan nym pynlong shuh sa kawei pat ka ‘hearing’ namar ka shu sepei kai ka jingpynlong ïa ka hearing ha Shillong.
