Jowai, Nailar 08:
Hadien 31 snem tam naduh ba uwei u briew u la shah pynïap, ka ïingbishar ha West Jaiñtia Hills, ha ka 4 tarik Nailar, 2023, ka la ai hukum ban set patok shirta jingim ïa kiba donkti.
Katkum ka jingïathuh jong u SP ka West Jaiñtia Hills, ha ka 16 tarik Naiwieng, 1991, ka la don ka jingujor (FIR) ha Ummulong Beat House da u Bah Kaia Muruh, hynmen jong u Bah Sada Muruh, ha kaba u la kynnoh ba san ngut ki briew ki la donkti ban pynïap ïa u Bah Sada Muruh ha ka shnong Lumkhudung.
Kitei san ngut kiba la shah jer kyrteng ki long u Tngen Muruh, Lowit Muruh, She Muruh, u Tne Muruh bad Kamai Muruh. Ka jingshah pynïap jong u Bah Sada Muruh ka la jia ha ka 16 tarik Naiwieng, 1991.
Hadien kata, ki pulit ki la pynrung ïa katei ka jingujor ha thanat Jowai (Case No.166 (9)1991) hapoh ki kyndon 302/34 IPC.
Ïa ka jingtohkit ha kato ka por la leh da u Sub-Inspector Q.E. Pala bad hadien ka jingtohkit, la ai ïa ka jingmudui sha ka ïingbishar pyrshah ïa kitei ki san ngut. Ka jingmudui ka la long hapoh ki kyndon 302/34 IPC. Hynrei, u Sub-Inspector Q.E. Pala u la khlad noh ha ka 11 tarik Jylliew, 2022.
Nalorkata, u SP ka West Jaiñtia Hills u la ïathuh ba napdeng kitei ki san ngut, arngut, kata, u Kamai Muruh bad u Lowit Muruh, ki la khlad noh katba ka jingbishar ka dang ïaid. Namarkata, ka jingtian bishar ka la long sa tang pyrshah ïa u Tngen Muruh, She Muruh bad u Tne Muruh.
Ha ka 4 tarik Nailar, 2023, u SP u la ong ba ka ïingbishar jong u Sessions Judge, West Jaiñtia Hills, hadien ba la peit bniah ïa ki sabut, ka la shem ba u Tngen Muruh, She Muruh bad u Tne Muruh jong ka shnong Lumkhudung, ki la donkti shisha ban pynïap ïa u Bah Sada Muruh. Ïa kine lai ngut la rai pynrem hapoh ka kyndon 302 IPC.
Namarkata, ka ïingbishar ka la hukum ba ka jingpynsaja ïa kitei lai ngut kan long da kaba set patok shirta jingim.
