Shillong, Nailar 09:
Ka Hynñiewtrep Achik National Movement (HANM) ha ka Sngi Balang ka la leit ban ïakynduh ïa u Chief Executive Member (CEM) ka Khasi Hills Autonomous District Council (KHADC), u Bah Pynïaid Sing Syiem na ka bynta ban dawa na ka KHADC ba ka dei ban bthah ïa baroh ki Syiem kiba hap hapoh u pud u sam jong ka KHADC ba kin hukum ïa ki Dorbar Shnong, ki Sordar Shnong bad ki Rangbah Shnong ba ki dei ban thaw ïa ki aiñ ban khang ïa ka jingïoh tnga mynder ki kynthei Khasi namar kane ka long ka jingïuhroit ïa ka Jaitbynriew ha baroh ki liang.
Haba kren sha ki lad pathai khubor mynta ka sngi ka 9 tarik u Nailar 2023, u President ka HANM, u Bah Lamphrang Kharbani u la ong ba nalor ba ïa ka khaïi ka pateng la klun lut da ki bar jylla bad lada kan jur sa ka jingïashong kha khleh, ka mut ka Jaitbynriew jong ngi kan sa poi ka por ba ngin sa kylla nongwei ha la ka jong ka ri.
“Lada ngi long tang ki rit paid kumba jia ha Tripura kan kham pher khyndiat, hynrei kum ki nongpeit pyrman lane kum ki nongïalam jong ka seng, ngi sngew tieng ïoh ba kine ki bar jylla ki long kiba heh paid ha kane ka ri jong ngi, ïoh ki leh kumba leh ki Meitei hapoh Manipur ki dawa ïa ka hok jong ki bad hangta kan sa jia ka thma bad ka jingïaumsnam khlem pep”, la ong u Bah Kharbani.
Nalor nangta, u Bah Kharbani u la ong ba ka jingdawa jong ka seng na u CEM ka long ba un lum bad bthah ïa ki Syiem ba kin bthah ïa ki dorbar shnong ba kin thaw ïa ki aiñ ban nym shah shuh ba ki kynthei Khasi kin shong kha bad u bar jylla.
“Ngim khang ïa ka jingieid jongno-jongno, hynrei wat wan pynjaboh pat ïa shnong ka thaw bad wat pynjaboh hapoh ka ri baieid jong ngi namar ngi la i ma ba ka shong kha ruh kan jyllei bad ka khaïi ka pateng ruh kin bat ma ki, shaei ka lawei jong ngi bad shawei ka lawei jong khun ki kti jong ngi kan poi”, la ong u Bah Kharbani.
