Shillong, Nailar 09:
Ka Awaken India Movement (AIM) ka la kynnoh ba ki don palat 2 lak ngut ki briew kiba la khlad noh hadien ba ki la shim ïa ka tika ïada COVID-19.
“Kumba 2,50,000 ngut ki briew ki la ïap syndet-syndet hadien ba ki la dep shim ïa ka tika ïada jong ka COVID-19. Nalor kine, ka kaiphod ba ngi la ïoh lum jong ki briew kiba kem jingpang syndet-syndet kum ka BP, ‘Stroke’ bad kiwei-kiwei…ki don 3,53,762 ki briew ha India kiba la kem pang syndet-syndet ynda ki la shim ïa ka tika,” la ong u Chairman ka AIM, Bah Banshai Marbaniang haba ai jingkren ha ka jingïalang ‘Peaceful Demonstration’ kaba la long ha phyllaw ka U Soso Tham Auditorium ha ka Sngi Balang.
Ka jingthmu jong katei ka jingïalang ka long ban pyrshah ïa ka jingleh donbor ka Sorkar India bad khamtam ka jingdawa ba ka World Health Organisation (WHO) ka dei ban mih noh na ka ri India.
Haba pynpaw ka jingsngewsih halor ka jinglong-jingman ha kylleng ka Ri India ha kine ki sngi ba mynta, u la ong ba ka Sorkar India ka la pynsngew sha ki paidbah ba kin ym ïoh jingïarap shuh na ka Sorkar India ne ki Sorkar Jylla bapher-bapher lada kim don ïa u ‘Aadhaar’.
“Ngam dei u ban mih na Meghalaya ban leit shong shnong sha Delhi, nga im bad don ha Meghalaya, ngan im bad ïap hapoh Meghalaya. Lada ngi pynkynmaw ïa ka jingkren u Myntri ka Sorkar Jylla, Bah Comingone Ymbon ha u bnai Jylliew mynta u snem, u la ong lypa ba u ‘Aadhaar’ um long uba donkam hapoh Meghalaya,” la ong u Bah Marbaniang.
Halor ka jingshna dawai jong ka WHO na bynta ki jingpang bapher-bapher, u Chairman u la kynnoh, “Kitei kim dei ki dawai ki ban ïada ïa ki jingpang hynrei ki dei ki dawai ban pynïap briew ha India da kaba wanrah ïa ka ri kaba duna paid jong ki nongshong shnong.”
Ha kajuh ka por, haba kren halor ka ‘Quit India Movement’ jong u Mahatma Gandhi, u la ong ba u heh spah ka pyrthei, u Bill Gates lem bad ka WHO ki dei ban mih noh napoh India.
“Ngi sngewthuh shai ba lada u Bill Gates un thied ïa ka WHO, ka WHO kan sa thied ïa ka India bad ngin sa long mraw ki ban shong shnong ha India,” u la ong.
Haba pynsngew ba ka jaidbynriew Khasi ka la dep ïathuh lypa ba dei ban bud ïa ki riti-dustur, u Bah Marbaniang u la kynnoh ba ka Sorkar ha kawei ka liang ïa kane bynta ka la klun noh bad ong ba lada leh kano-kano ka prokram ba ïadei bad ki riti-dustur kam long shuh bad lada ki Rangbah Shnong, ki Syiem, ki Sordar ki ïaid ïa ka lynti ba ïadei bad ka riti-dustur, ka Sorkar kan ym shah.
Shuh shuh utei u nongïalam haba buh jingkylli halor ka jingdon jong ka District Council, u la bynrap, “Ka District Council ka dei kawei pat ka Sorkar kaba khlaiñ duh ban peit ïa ka riti-dustur ha ka Jylla jong ngi…naduh ka synshar-khadar, khaïi-pateng, kamai-kajih, nadong-shadong ka dei ban peit ka District Council, ka Sorkar ka dei ban wan hadien. Kaba lyngngoh ka long ba ka District Council ka khlem treikam haduh kat kine ki sngi kiba mynta…ka dawbah ka long ba ka Sorkar ka ong em, ngi dei ban leh ma ngi ïa baroh ki bynta.”
