Shillong, Nailar:
Ka Honda Motorcycle & Scooter India (HMSI) ka la pynlong ïa ka jingïalap paidbah shaphang ka jingshngaiñ ha ki lynti syngkien ïa kaba la tip kum ka National Road Safety Awareness Campaign ha Umden, Meghalaya, da ka jingthmu ban pynsngewthuh ba donkam ban wanrah ïa ka jingshngaiñ ha kaba ñiah ïa ki kali ar shaka bad ïa kane ka jinghikai la ai sha palat 1800 ngut ki khynnah skul bad ki nonghikai. Kane ka jingai jinghikai ba ar sngi lynter ïa kaba la pynlong ha St. Joseph H.S. School ha Umden kadei kaba la ai na ka bynta ban ïahap bad ka rta jong ki nongshah hikai khnang ba yn lah ban pynsaphriang ïa ka jingshngaiñ ha ki lynti syngkien. Ka jingthmu jong kane ka jingïalap paidbah ka long ban wanrah ka jingmlien ha ki briew ba kan don ka jingshngaiñ ha ka jingñiah ïa ki kali ar shaka ha India bad ban kyntiew ruh ïa ka rukom ñiah kali ha ka rukom kaba shngaiñ.
Kane a prokram ka kynthup ïa ki rukom ai jinghikai ba la shna pynwandur bha, kaba hikai ruh lyngba ka jingai ka jingpyrshang ha ki Virtual Riding Simulator, ki jingïakren bad ai jingmut mar kylliang da kaba pyndonkam ïa ka Kiken Yosoku Training (KYT), bad na ka bynta kito kiba la ñiah lypa ïa ki ar shaka ba kin nang kham pyntbit shuh shuh ïa ki sap jong ki lyngba ka jingñiah suki bad ñiah ruh ha ki lyntang kiba rit. Ka Honda man la ka sngi ka pynlong ruh ïa ki jingai jinghikai da kaba pynlong ïa ki jingïalehkai halor ka jingshngaiñ ha ki lynti syngkien bad pynlong ruh ïa ki Quiz, ban pyntikna ba ki khynnah kin sngewthuh bad shemphang shaphang ki jingshngaiñ ha ki lynti syngkien.
Haba kren shaphang ka jingtrei jong ka HMSI ban pynrung ïa kane ka jingsngewthuh ba donkam ban pynlong ïa ka India kaba lait na ki jingïatyngkhuh kali, U Vinay Dhingra – Senior Director, HR, Admin, IT & Corporate Affairs, Honda Motorcycle & Scooter India u ong, “Ka jinghikai shaphang ka jingshngaiñ ha surok ka long kaba donkam na ka bynta ban don ka jingmut jingpyrkhat jong ki briew shaphang ka jingshngaiñ ha ki lynti syngkien. Lyngba kane ka jingïalap paidbah, ka jingthmu jong ngi ka long ban pynrung ha ka jingsngewthuh jong ki briew shaphang ka jingshngaiñ ha ki lynti syngkien hapdeng ki nongñiah ar shaka kiba dang thymmai bad kumjuh ruh ban ïarap ïa ki ban sngewthuh shaphang kumno ban pyndonkam ïa ki lynti syngkien ha ka rukom kaba shngaiñ.”
