Shillong, Nailar 09:
U Myntri Rangbah ka jylla, u Conrad K Sangma u la kren shai sha ki paralok kiba donlang hapoh ka National Democratic Alliance (NDA) ba lada don ba ong ïa u ban leh kiei-kiei kiba long pyrshah ïa ki paid riewlum ka Thaiñ Shatei Lam Mihngi (North East) un nym lah satia ban kubur, bad u la bynrap ba ka NDA ka dei tang ka kynhun ban ïatrei ha ka saiñ hima.
U Conrad u la pynpaw ïa kane haba u kren ha ka jingïalang ban kynmaw ïa ka International Day of Indigenous People kaba la pynlong da ka North East Indigenous Peoples’ Forum (NEIPF) Meghalaya State Chapter ha Shillong ha ka Sngi Balang.
“Nga kren naduh ka mynsiem bad nga kwah ban pynpaw ba ngi don ha ka kynhun National Democratic Alliance (NDA), bad nga ong ïa ki nongïalam ka NDA ba kane ka kynhun ka dei ban ïatrei ha ka saiñ hima. Hynrei lada phi ong ïa nga ban leh kiei-kiei kiba long pyrshah bad pynsniew ïa ki paid riewlum jong ngi, ngam lah satia,” la ong u Conrad.
Kane ka jingkren u Conrad ka la wan ruh ha ka por ba ka Sorkar NDA ka dang pyrshang ban wanrah ïa ka aiñ kum ka Uniform Civil Code bad kiwei-kiwei ki aiñ kiba lah ban ktah ïa ki paid riewlum.
U Conrad uba dei ruh u National President ka National People’s Party (NPP) u la ong ba um lah ban ïapeiñ haba ïadei bad ki paidbah kiba long ma ki kiba ailad ïa u ban trei bad kiba la ai ka jingshaniah ha u.
U la ong ba u la ïai ïakhun ha ki por ba la dep, bad un ïai bteng ban ïakhun namar ki don ki jingeh kiba khang bad kiba ngi mad bad ngi donkam ban wan ka roi ka kiew.
Haba kren shaphang ka Thaiñ Shatei Lam Mihngi (North East), u Myntri Rangbah u la ong ba ka North East ka dei ka thaiñ kaba eh bad kaba bun ki jnit ki jnat bad diengpyngkiang ha kaba ki lah ban don ki jaitbynriew ki bym peit shuh markhmat hynrei ki don pat shibun ki bynta bad ki mat kiba wanrah lang kawei ia ngi baroh.
U la ong ruh ba ka jingkhlaiñ kan sa paw haba ngi don lang bad kum kane ka jingïakynduh, ngi lah ban weng noh sharud ïa kiwei kiwei ki jingsngew ïapher halor kiba bun ki mat.
