Shillong, Nailar 09:
Ka Sur Ka Bri U Hynñiewtrep kan sa shong jingïalang ha ka 12 tarik mynta u Nailar, 2023 ban ïakren ïa ki kam kiba dang sahteng halor ka jingshah pynïap u Bah Cherishstarfield Thangkhiew uba dei u General Secretary barim ka HNLC.
Ka seng kan sa kynmaw burom ruh ïa ka lyngkhuh sngi ïap kaba ar snem ha ka 12 tarik mynta u bnai da kaba leit buh syntiew ha u lum jingtep.
Kum ban shu pynkynmaw u Bah Cherishstarfield u la shah pynïap ha ka por ba ki pulit ki leit ban khynra ïa ka ïingsah jong u ha Mawlai ha ka step jong ka 13 tarik Nailar, 2021 bad kane ka jingshah pynïap ka la pynkhih win ïa ki paidbah ka Mawlai bad ïa ka jaidbynriew baroh kawei.
Haba ïakren bad u Bah Thomas Passah uba dei u nongïalam Ka Sur Ka Bri u Hynñiewtrep u la ïathuh ba ka kynhun kan sa shong jingïalang ha ka 12 tarik mynta u bnai bad ban leit buh syntiew ha u lum jingtep ban kynmaw burom ïa ka jingkhlad ba ar snem u Bah Cherishstarfield.
U la ïathuh ba ka jingdawa jong ka kynhun haduh mynta kam pat seisoh namar watla ka kynhun tohkit ka la wanrah ïa ka kaiphod sha ka sorkar jylla hynrei haduh mynta kam shym la don ka jingseisoh.
U la ïathuh ba ka kynhun ka dawa ba ka sorkar ka dei ban pynshitom ïa kito kiba donkti ban siat ïap ïa u Bah Cherishstarfield hynrei haduh mynta ym pat ïohi dak eiei.
