Shillong, Nailar 10
Ka Sorkar Kmie ka la mynjur ïa ka song pisa kaba T.146.79 klur na ka bynta ban shna ïa ka surok Four-lane bad ruh ban pynkylla ïa ka surok Two-Lane sha ka Four-Lane. Ha kine surok kin don ki bynta ban ïaid ki cycle, ki lynti ïaid kjat bad kiwei kiwei ha New Shillong Township (NST).
Ïa kane ka projek la bei pisa lyngba ka Prime Minister’s Development Initiative for North East Region (PM-DevINE) jong u snem mang tyngka 2022-2023. Ïa ka PM-DevINE la pynbna kum ka Central Sector Scheme ba thymmai ha ka mang tyngka ka Sorkar Kmie jong u snem 2022-2023.
Haba buh hakhmat ïa ka thong jong ka skhim, haduh 11 tylli ki projek ki la kot haduh T.1503.44 klur kiba kynthup ïa 7 tylli ki projek ba la pynbna ha ka mang tyngka 2022-2023 la dep ban jied ban pyllait pisa noh ha une u snem mang tyngka 2022-2023.
Ka jaka ka dei ka kam jong ka Sorkar Jylla bad ka bailut baisep ha ka jingthied ïa ki jaka la khmih hi da ka Sorkar Jylla katkum ki aiñ bad ki kyndon kiba don.
