Shillong, Nailar 11
Ka Kynhun Myntri ka Sorkar Jylla ka la ai jingmynjur ban pyrkhing noh ïa ka jingleit bar ri ki Myntri Sorkar bad ki ophisar da kaba shah ba kin leit tang ar sien shisnem ha ryngkat ki daw kiba biang lada ki mut ban leit bar ri ha ka sien ba-ar.
Haba pynbna ïa ka rai ba la mynjur da ka Kynhun Myntri ha ka sngi Thohdieng, u Myntri Sorkar uba dei ruh u nongaiktien ka Sorkar MDA, u Bah Paul Lyngdoh u la ong ba ka Kynhun Myntri ka la ïatai ïa kane ka mat bad rai ban pyrkhing bad buh da u pud ïa ka jingleit bar ri naduh u Myntri Rangbah, ki Myntri Sorkar bad ki ophisar.
U la ong ba ïa ka jingleit bar ri yn shah tang ar sien shisnem. Hadien ba ki la leit ha ka sien banyngkong, donkam ban pyni kaiphod lada hap ban leit sa ha ka sien ba-ar. Ka jingmynjur ban leit bar ri ha ka sien ba-ar kan shong ruh ha kata ka kaiphod ka long ne em kaba pynhun.
U Bah Paul u la ong ba kane ka jingpyrkhing ka long shibynta ban tehlakam ïa ka jingpynlut na ka pla tyngka ka Sorkar bad hap ban pynshong nongrim bha ïa ki jingleit bar ri.
Haba kylli shaphang ki jingshah khot sngewbha na kiwei ki ri lada don kino-kino ki jingïalang ne prokram, u Bah Paul u la ong ba katto-katne na kine ki jingleit bar ri lehse ki dei halor ka jingshah khot sngewbha, kum ki kynja jingïalang bad kumta ter ter na ka bynta ki prokram bapher bapher. Hynrei la rai ba lada u juh u ophisar u hap ban leit jingleit arsien shisnem, u dei ban aiti shuwa ïa ka kaiphod jong ka jingleit bar ri banyngkong. Ynda la aiti ïa ka kaiphod kaba pynhun bad kaba pyni ba don ka jingseisoh, yn sa lah ban ai jingbit ban leit biang sa ha ka sien ka ba-ar.
Haba kylli katno tylli ki khep ki don ba ki ophisar ki la leit bar ri palat ar sien shisnem, u Bah Paul u la ong ba ki don bun ki khep kiba kum kine, tangba ym pat lah ban ai jingkheiñ kaba bniah.
Nalor nangta, u la bynrap ruh ba la rai ba ka Sorkar ka lah ban bei pisa tang ïa kawei ka jingleit bar ri, bad ïa ka sien ba-ar yn hap ban bei da ka Sorkar India lane kino-kino ki kynhun kiba nabar ri.
Hynrei la pyllait noh na kine ki jingpyrkhing tang lada ki don ki heh Sorkar ki hap leit sha ki bar ri ban pdiang ïa ki kynja khusnam na ka bynta ka Sorkar Meghalaya.
Haba kylli shaphang ka jingleit bar ri ki Myntri Sorkar kynthup ïa u Myntri Rangbah, u Bah Paul u la ong ba kane ka shong ruh ha ka jingai jingbit jong ka tnat bar ri ka Sorkar India lane Ministry of External Affairs (MEA).
U la ong ba dang shen, ka MEA ka la wanrah ïa ka kyndon kaba pyrkhing bha wat ban ai jingbit ïa kum kine ki jingleit bar ri kaba kynthup wat ïa u Myntri Rangbah ka Jylla.
