Shillong, Nailar:
Ka All Tamil Nadu Students’ Association (ATSA) lyngba ki nongkitkam jong ka kiba kynthup ïa u Vishnuram P. (President), u Rajarajacholan (Joint Secretary), u Gideon Bala Singham (Treasurer) bad u Ragu (Advisor) ki la wan na Tamil Nadu ban ïakynduh ïa ki nongïalam ka KSU ha Shillong ban ïasyllok halor kiba bun ki mat kiba ktah ïa ki paid trai shnong ha ka Thaiñ Shatei Lam Mihngi bad ka Thaiñ Shathie ka India.
“Ki nongïalam ka ATSA ki la pynsngew ïa ka jingeh ki paid Tamil bad kiwei ki paid Dravidian hapoh ri India – kumjuh ki nongïalam ka KSU ki la pynsngew ïa la ki jingeh bad diengpyngkiang ïa ka Jaidbynriew Khasi,” ong General Secretary ka KSU, samla Donald V. Thabah ha ka kyrwoh khubor.
U la ïathuh ba ki 2 seng ki la ïasyllok ruh halor ka jingshah ïuhroit ki nongshong shnong ka Thaiñ Shatei Lam Mihngi bad ki nongshong shnong ka Thaiñ Shathie ka India la ka dei ha ki aiñ Sorkar Pdeng ki bapher-bapher kum ka jingpynbor ban pyndonkam ïa ka ktien ‘Hindi’ bad ka jingshah buhai shnong pathar ha kiwei pat ki Jaidbynriew la ka dei ha Meghalaya lane ha Tamil Nadu.
“La ïakren bniah ruh kumno ban wad lad wad lynti ban ïada ïa ki trai-ri trai-muluk ha Tamil Nadu bad Meghalaya kumjuh ban kyntiew ha ka liang ka pule ka puthi bad ka ïoh ka kot,” u la ong.
Na ka liang ki 2 seng ki la rai ban ïatreilang nangne shakhmat ha kaba ïadei bad ki mat ki jura kiba ktah ïa ka bha ka miat bad ka ïap ka im ki paid trai shnong ha Thaiñ Shatei Lam Mihngi bad ha Thaiñ Shathie ka India.
Shuh shuh ka ATSA ka la kular ban ïarap ïa ki samla pule Khasi kiba don sha Tamil Nadu lada ki shem kano-kano ka jingeh.
Kham ha shuwa, ka ATSA ka la ïakynduh ruh ïa ki nongïalam ka Naga Students’ Federation (NSF) ha Guwahati bad kine ki seng ki la shim kijuh ki rai ban ïa treilang nangne shakhmat.
