Shillong, Nailar:
Ka Reliance General Insurance Co. Ltd. (RGICL) kaba long ka kompani ba pawnam ha India ha ka liang ka jingai jingshakri ha kaba ïadei bad ka jingbuh Insurance ka la ïoh pdiang ïa ka jingpynkup bor na ka bynta ban pyntreikam ïa ka Megha Health Insurance Scheme (MHIS) bad ka Ayushman Bharat Pradhan Mantri Jan Arogya Yojana (AB-PMJAY)-Phase 6 ne ka bynta ba 6 ha ka jylla Meghalaya ïa kaba la ai bor da ka tnad Health and Family Welfare, ka sorkar Meghalaya.
Ïa kane ka jingai bor la ïoh pdiang hadien ka jingïakhun ïa ka Bidding ne ka jingbuh dor, ha kaba ka RGICL ka la long ka nongjop ïa ka jingïabuh dor ha kaba ka la ai ïa ka dor kaba long ka jingïakhun bad kiwei pat kiba ïa kop. Ka sorkar Meghalaya ka la rai ban pynthymmai ïa ka jingïoh myntoi ne ki Health Benefits Package bad kiwei kiwei ki bynta ha ka Insurance Contract jong ka MHIS 6 bad mynta ka la rai ban pyntreikam noh ïa ka MHIS 6 Scheme ryngkat ka jingïatreilang bad ka PMJAY, ka ban ai ïa ka Insurance kaba palat 5,30,000 na ka bynta baroh ki dkhot kiba hap ha kawei ka long bad kiba dei hok ban ïoh myntoi.
Kane ka jingïakut ne ka Contract kan kynthup haduh palat 7 lak tylli ki longïing ha Meghalaya, ha kaba kin ïoh ïa ka pisa ban pynlut na ka bynta ka pang ka shitom ne Health Insurance ka ban long na ka bynta ka jingleit thiah pang jong ki ha ki hospital, ban leit shim dawai, ban leh ïa ki Test ne Diagnostic Tests, bad ban leit shim dawai biang hadien habud.
