New Delhi, Nailar 13
U Myntri Rangbahduh Narendra Modi un ïalam ïa ka ri ha ka jingrakhe ïa ka sngi laitluid kaba 77 na Red Fort, Delhi ha ka 15 tarik Nailar, 2023.
U Modi un pynher ïa ka Lama jong ka Ri bad ai jingkren sha ka ri na ki kynroh jong ka Red Fort.
Ka jingrakhe mynta u snem kan dei ruh ka jingpynkut ïa ki jingrakhe ‘Azadi Ka Amrit Mahotsav’ kaba la plie da u Myntri Rangbahduh na Sabarmati Ashram ha Ahmedabad, Gujarat ha ka 12 tarik Lber, 2021 bad sa shisien, kan ïalam ïa ka ri sha ka ‘Amrit Kaal’ da ka bor kaba thymmai ban pynurlong ïa ka jingangnud jong u Myntri Rangbahduh ban pynlong ïa ka India ka ri kaba la kiew ha shuwa u snem 2047.
Ha kajuh ka por, la shim ruh ïa bun ki sienjam kiba thymmai ban rakhe ïa ka sngi laitluid kaba 77 bad kumta la khot sngewbha ïa bun bah ki briew haba ïanujor bad u snem ba la dep.
La khot sngewbha kumba 1,800 ngut ki briew na ki jaka bapher-bapher, ryngkat bad ki kurim jong ki na kylleng ka ri ban ïadon bynta ha ka jingrakhe ha Red Fort kum ki briew ba shah khot kyrpang. La shim ïa kane ka sienjam ha kaba ïadei bad ka thong jong ka Sorkar na ka bynta ka ‘Jan Bhagidari’.
Ki ‘Selfie Point’ ki dei na ka bynta ki skhim bapher-bapher bad ki sienjam jong ka Sorkar kiba la buh ha 12 tylli ki jaka, kynthup ka National War Memorial, India Gate, Vijay Chowk, New Delhi Railway Station, PragatiMaidan, Raj Ghat, Jama Masjid Metro Station, Rajiv Chowk Metro Station, Delhi Gate Metro Station, ITO Metro Gate, Naubat Khana bad Sheesh Ganj Gurudwara.
Ki Skhim/ki sienjam ki kynthup ka Global Hope: Vaccine & Yoga; Ujjwala Yojana; Space Power; Digital India; Skill India; Start-up India; Swachh Bharat; Sashakt Bharat, Naya Bharat; Powering India; Pradhan Mantri Awas Yojana bad ka Jal Jeevan Mission.
Kum shi bynta ki jingrakhe, yn pynlong ïa ka jingïakob ‘online selfie’ da ka tnad Ïada ri ha ka rynsan ‘MyGov’ naduh ka 15-20 tarik Nailar. Kumjuh yn pynshlur ïa ki briew ba kin shon ‘selfie’ – la kumno-kumno kawei na ki 12 tylli ki jaka ba la buh bad ‘upload’ ïa ki ha ka rynsan ‘MyGov’ ban ïashim bynta ha kane ka jingïakob. Khatar ngut ki nongjop, iwei na man ka jaka shon ba la buh, kin shah jied katkum ka jingïakob ‘online selfie’. Ka khusnam pisa ban ai sha ki nongjop kan long mar T. 10,000.
La phah ruh ïa baroh ki jingkhot sngewbha lyngba ka bor ‘internet’ lyngba ka rynsan aamantran (www.aamantran.mod.gov.in) bad la phah 17,000 tylli ki ‘e-invitation card’ lyngba kane ka rynsan.
Haba phai sha ka prokram ha Red Fort, yn pdiang burom ïa u Myntri Rangbahduh da u Myntri ka tnat kam ïada ri, u Rajnath Singh, u Myntri Khynnah ka tnad kam ïada ri, u Ajay Bhatt bad u Secretary ka tnad kam ïada ri, u GiridharAramane.
U Secretary un pynithuh ïa u General Officer Commanding (GoC), thaiñ Delhi, u Lieutenant General Dhiraj Seth ïa u Myntri Rangbahduh. Hadien kane, u GoC thaiñ Delhi un ïalam ïa u Modi sha ka jaka shim ïa ka ‘Salute’ ha kaba ka kynhun ki nongpahara bad Delhi Police kin ‘Salute’ ïa u Myntri Rangbahduh. Hadien kane, u Modi un peit ïa ka ‘Guard of Honour’.
