Shillong, Nailar 16
U Myntri Rangbah ka Jylla Conrad K Sangma ha ka Sngi Balang u la plie paidbah ïa ka karkhana pynmih sboh mar rep (biofertilizer) ba nyngkong eh ka Jylla kaba don ha ka shnong Kyiem, Mawphlang.
Kane ka karkhana ka don jingthmu ban nang pynshlur shuh shuh ïa ka kam rep mar rep khlem dawai bad ban pynthikna ha ka ban lah pyndap ïa ka sboh mar rep ba khlem khleh kynja dawai.
Haba plie ïa kane ka karkhana, u Myntri Rangbah u la ong ba kane ka karkhana kan kyrshan ïa ka sienjam jong ka Sorkar Jylla ban pynkylla ïa ka rep ka riang sha ka rukom rep ba khlem ai dawai ne ka organic agriculture.
“Ka thong jong ngi ka long ban pynshlur ïa ka rep khlem khleh dawai ha baroh kawei ka Jylla bad kane ka biofertilizer ka dei kawei na ki kam ba kongsan jong kane ka lynti ba ngi shim,” u la ong.
U Myntri Rangbah u la ban jur ba ka jingpynlah pynbiang ïa ki sboh khlem dawai ha ki ïew ki hat ka long kaba kongsan bha ha kaban lah pynurlong ïa ka thong jong ka oragnic movement.
“Ka kam rep khlem khleh dawai ka shaniah tylli ha ka jingïoh ïa ki sboh khlem dawai. Lada ngim lah ban pynthikna ïa ka jingïoh ïa kane ka sboh, ha ka dor kaba dei bad ka por kaba biang, baroh ki jingpyrshang jong ngi kin shu sepei noh,” u la ong.
Kumba long mynta, ka jingdonkam jong ka Jylla ïa ka sboh khlem dawai ka kot haduh 25,000 metric ton. Namar ka jingrep khlem sboh dawai kala nang kiew bad nang pur sha kiwei kiwei ki bynta jong ka Jylla, la khmih lynti ba ka jingdonkam ïa kane ka sboh kan nang kiew nang kiew.
U Myntri Rangbah u la pynpaw ïa ka jingsngew skhem ba kane ka karkhana pynmih sboh biofertilizer kan shim ïa ka bynta ba kongsan bha ha kaban pyndap pynbiang ïa ka jingdonkam sboh jong ka thaiñ bad ka Jylla baroh kawei.
