Shillong, Nailar 16
Ki bahaïing hasem ki la rai ban nym buddien shuh ban wad ïa ki briew kiba donkti ban pynïap ïa u Rishad Sing Kharmuti hadien ba ki pulit ki la lap ïa ka met jong u ha ka 14 tarik mynta u bnai. U Bah Rishad Sing u la jah naduh ka 11 tarik mynta u bnai hadien ba u mih na ïing na Mawdiangdiang ban leit die sying sha Ïewduh.
Haba ïakren bad u Bah Banlang Kharmuti uba dei u hynmen jong u Bah Rishad Sing Kharmuti u la ïathuh ba ka ïing ka sem ka la rai ban hun noh hadien ba ki la lap ïa ka met ïap jong u para, namar kim kwah shuh ban buddien wat la ki la dep ai ejahar ha ki pulit.
U la ïathuh ba katkum ka jingbatai ki pulit ba ïa ka met jong u para la lap na nala ha Them Bijoy hajan ki karkhana shna kali, kaba don ruh ka jaka ïeng kali, hynrei kim tip thikna ïa ka jaka namar kim shym la poi shuh namar ki la leit beit-beit sha Civil Hospital Shillong.
Shuh shuh u la pyntip ba katkum ka CCTV la ïohi ba ha ka por 5:30 janmiet jong ka 11 tarik mynta u bnai u Bah Rishad Sing u la mut kiew sha kali hynrei u khlem kiew shuh bad naduh kata ka por khlem ïohi shuh ïa u.
Nalor kata, u la pynpaw ka jingsngew tieng lada jia kumne ka jingshah pynïap ban leit sha ïew sha hat.
Kumta u la ong ba ka dei ka kamram jong ki pulit ban wad ïa ki nongleh kam sniew hynrei ka kam jong ki, ki la hun haba ki la ïoh ïa u bahaïing uba la jah na ïing.
Nangta shuh shuh u la ïathuh ba u sying u shongdor T.7000 shi mon bad ka pisa ha ka met jong u kan don beit kumba T.14000 namar u kit ar mon u sying haba u mih na ïing.
