Shillong, Nailar 17
Hadien ba ka Sorkar Pdeng lyngba ka tnat ka rep ka riang ka la sngap ïa ka jingkyrpad u Myntri Rangbah ka Jylla u Conrad K Sangma ban shah ïa ki samla kiba na Meghalaya kiba ju pule ha Central Agriculture University (CAU), Imphal ban bteng ïa ka jingpule jong ki na ka jaka ai jinghikai jong ka CAU kaba don ha Kyrdemkulai, Ri-Bhoi District, mynta ka Sorkar Jylla ka dang ap sa ïa ka jubab na ka tnat ka koit ka khiah ka Sorkar Pdeng haba ïadei bad ki samla ka Jylla kiba pule doktor ha Manipur.
“Ka Sorkar Jylla ka dang ap ïa ka jubab na ka Sorkar Pdeng haba ïadei bad ki samla kiba leit ban pule doktor ha Regional Institute of Medical Sciences (RIMS) ha Manipur kumno ban pynbiang ïa ka jinghikai namar ki samla ki la shah ktah bha ha kine ki khyndiat bnai hadien ba ki la hap ban wanphai sha ka Jylla namar ka jingumsnam ha Manipur,” la ong ka tyllong khubor.
Ki don palat spah ngut ki samla pule na Meghalaya kiba leit pule ha ki jaka pule ka Sorkar Pdeng ha Manipur kynthup kiba pule doktor, hynrei ki la hap ban wanphai noh sha Jylla lajong ha u ’nai Jymmang hadien ba la mih ka jingumsnam kaba shyrkhei ka bym pat kut haduh mynta.
Dang shen ka Sorkar Pdeng ka la mynjur hadien ba u Conrad u la pynsngew bad kyrpad ïa u Myntri ka Sorkar Pdeng uba peit ïa ka kam rep, u Narendra Singh Tomar ha ka jingïakynduh ïa u ha ka 7 tarik mynta u bnai ha New Delhi.
U Conrad u la aiti ïa ka shithi bad kyrpad ïa ka Sorkar Pdeng ba kan shah ïa ki samla pule na Meghalaya kiba pule ha CAU Imphal ba kin bteng noh ïa ka jingpule jong ki na ka shnat pule jong ka CAU ha Kyrdemkulai Ri-Bhoi District khnang ba kin bteng ïa ka jingpule khlem kano-kano ka jingduh.
Katkum ka hukum kaba pynmih da ka CAU, Imphal ha ka Lah Sngi U Blei ka 14 tarik, la ong ba ka skulbah ka la rai ba ki jingai jinghikai na ka bynta ki Undergraduate kiba dei na shabar ka Manipur kiba pule ha College of Agriculture, Imphal bad College of Food Technology, Imphal jong u snem pule 2020-21, 2021-22 bad 2022-23 yn pynlong ïa ka jinghikai ‘online’.
La ong ba ka jingpynmih hukum ka CAU, Imphal, ban leh ïa kine ki jingpynbiang ka dei namar ka jinglong jingman ha Manipur bad ruh ki jingkyrpad kiba la wan na ki kmie ki kpa jong ki samla pule bad na ki heh ki haiñ bad ki khliehduh jong ki Sorkar.
La ong ba ki jinghikai na ka bynta kiba pule Masters bad PhD ha College of Agriculture, Imphal kin sa ïoh jinghikai lyngba ka ‘online’.
Ka RAWE programme na bynta kiba dei jong u 2020-21 ha ka B.Sc Agriculture kin ïoh ban pule ha la ki jong ki jylla.
Ki samla pule M.Sc bad PhD jong ka College of Agriculture, Imphal kiba la dep ka jingpule ki lah ban bteng ïa kiwei pat ki jingpule kum ka jingwad bniah (research work) ha ki College ka CAU/ICAR kiba don hajan hapoh ka Jylla jong ki ha ryngkat ka jingïasyllok bad ki nonghikai jong ki kiba hakhmat.
Kiba leh ïa ka bynta bakut artad jong ka jingpule na bynta ka M.Sc ne PhD ki lah ban pyndep lane bteng ban thoh ïa ka jingbatai bniah (thesis) da kaba ïasyllok lang bad ki nonghikai kiba kdew lynti ïa ki khnang ban lah ban pyndep kloi.
