Shillong, Nailar 17
Ki nongñiah kali kiba ju pynïeng kali hapoh ka jaka ïeng kali ha khlieh Ïew jong ka Muda Parking Lot ki la ud la nam shikatdei eh ïa ka jingdheng kali kaba jur bha hashwa ban rung shapoh katei ka jaka bad ka jingrben ka jaboh kaba don hapoh katei ka jaka ïeng kali.
Na ka liang u President jong ka Krang Association, u Bah Loskar Kyrsian, u la ong ba ha ki por kiba la dep ka la don ka jingsniew ka surok hashwa ban rung shapoh katei ka jaka pynïeng kali bad hadien katto katne por eiei pat, ïa katei ka surok la dep ban pynbha noh hynrei mynta pat ka la mih sa ka jingsatah bad ka jingrben ka jingjaboh kaba shyrkhei bad ka jingdheng kali kaba jur hashwa ban rung shapoh katei ka jaka pynïeng kali.
U Bah Kyrsian u la ong ba ki ju don ki por ba katei ka jingdheng ka ju neh kumba 1 kynta eiei naduh shwa ban rung hapoh katei ka jaka pynïeng kali. U la ïathuh ba ka daw ka jingdheng kali ha katei ka jaka ka lah ban dei na ka daw ka jingpynïeng ïa ki kali ha baroh arliang ki surok bad ba kam biang bha ka rukom pynïaid jong ki nonglum khajna ha katei ka jaka.
Nalor nangta, u la ong ba kum ki nongñiah kali kiba ju kamai bad pynïeng kali ha katei ka jaka ki kwah ban lait noh na katei ka jingdheng kali bad ka jingsma iwtung hapoh katei ka jaka khnang ba ki paidbah kiba wan ban kiew kali kin nym shem shitom satia.
“Hynrei ka jingshitom mynta kaba kham jur eh ka dei kane ka jaboh bad wat mangi ki nongñiah kali ruh tangba ngin rung shapoh ruh, ngi hap ban phong da ka juti kaba rben bad ngin da phong da ka slipar ruh ym long”, la ong u Bah Kyrsian.
U Bah Kyrsian u la ïathuh ba ka jingjaboh hapoh katei ka jaka pynïeng kali ka la pynlong ïa ki paidbah ba kin artatien ban rung shapoh. Ha ka por ba ki shong hapoh kali ruh kim lah ban shah ïa ka jingsma kaba mih na katei ka jaka bad ka la pynlong ïa ki ba kin dap kpoh.
Namar kata, u Bah Kyrsian u la ong ba kum ki nongñiah kali bad kum ki paidbah kiba hap ban shong kali na katei ka jaka ki da angnud shikatdei eh ban ïohi ba katei ka jaka kan long kaba khuid kaba suba khlem don shuh ka jingsma.
Haba kylli la hato na ka liang ka kynhun bad na ka liang ki nongñiah kali ha katei ka jaka ki la dep ban kynduh lane ujor sha ki nongpynïaid ïa ka jingkhrong khajna ha katei ka jaka ha kaba ïadei bad ka jingdheng kali bad ka jingsma, na ka liang u Bah Kyrsian u la ong ba ha ki por kiba la dep ki la dep ban ïakren bad kitei ki nongpynïaid, hynrei katei ka jingïakren ka la shu sahkut kumto.
“Ngi kwah ba kine ki artylli ki jingeh yn lah ban weng, kaba nyngkong ka long ka jingkhuid jingsuba bad kaba ar ka long ban weng ïa ka jingdheng kali nangtei nakhmat shwa ban rung shane shapoh ka jaka ïeng kali, lada lah ban weng ïa kita artylli ka la pynhun keiñ ïa ngi ki paidbah”, la ong u Bah Kyrsian.
Nalor nangta, u la ïathuh ruh ba ki khyllung ki khynnah kiba ïoh pang malu-mala haba ki wan kiew kali na katei ka jaka ïeng kali, ka la pynlong ïa ki ba kin ïoh pang kham jur bad ha ka jaka ba ki paidbah kin ïoh ban ring ïa ka lyer kaba khuid hynrei haba ki wan ban shong kali na katei ka jaka, ki hap ban ring mynsiem da ka lyer kaba sniew.
Namar kata, u la kyntu bad kyrpad ïa ki nongkhrong khajna ha katei ka jaka ba kin pynïaid kham bha ïa ka rukom pynïeng kali khnang ba kan pynsuk ïa ki nongleit nongwan bad ban weng ïa ka jingdheng kali na katei ka jaka bad kumjuh ruh ba kin pynkhuid noh ïa ka jaboh jabaiñ khnang ba ki paidbah khamtam eh ïa ki draibar kali kiba im ja na katei ka jaka kin don ha ka met ka phad kaba shait kaba khlaiñ.
“Ngi kwah ban kyntu ïa ka ophis la kumno kumno ba kan leh kham kloi noh ïa kane ka kam khnang ba kan pynsuk ïangi ki paidbah”, la ong u Bah Kyrsian.
Na ka liang u Bah Markus Ryntathiang uba dei uwei napdeng ki nongñiah kali napoh ka shnong Krang, u la ong ba ka jingjaboh ha katei ka jaka pynïeng kali kam ïadei dur bad kiwei ki jaka pynïeng kali, bad u la ong ba kiwei ki jaka pynïeng kali haba ki jaboh, ki ju don da ki nongsar bad ki nongpynkhuid ïa ka jaka, hynrei ki nongpynkhuid ïa katei ka jaka ïeng kali jong ki pat haba ki pynkhuid ki la shu lum la lang ïa ki jaboh shi jaka bad kim ju khat satia kaba la pynlong ïa kitei jaboh jabaiñ ba kin satah kylleng katei ka jaka ïeng kali.
Nalor nangta, u la ong ba kum ki nongñiah kali ha katei ka jaka haba ki phong da ki slipar ruh kam long satia ïa ki namar ka jingjaboh ha katei ka jaka ka la long kaba shyrkhei ha kaba ki kjat jong ki ki ju mih khñiang hynrei lada ki phong da ka juti kaba rben ruh ka shit lhop bha.
U la ong ba lada kum ki nongñiah kali kim ai ïa ka bai pynïeng kali sha ki nonglum khajna tang shisngi ruh, kitei ki nonglum khajna kim shah ïa kitei ki nongñiah kali ba kin ïaid lane mih napoh katei ka jaka pynïeng kali.
U Bah Ryntathiang u la ong ba haba ki nongñiah kali ki pynbiang bad ai thik ïa ka dor jong ka bai pynïeng kali kaba long T.100 hynrei shaei ki buh ïa katei ka pisa namar wat ban buh ïa ki nongsar ne nongpynkhuid ruh kim buh bad kane ka la ktah bha ïa ki nongñiah kali ha katei ka jaka.
Shuh shuh u Bah Ryntathiang u la ong ba kitei ki nongkhrong khajna ha katei ka jaka ki la pynkiew ïa ka bai ïeng kali da T.100. Kumta na ka liang ka kynhun jong ki nongñiah kali ha katei ka jaka ki la leit ban ujor sha ki nongkhrong khajna ha katei ka jaka ba kumno ki pynkiew ïa ka bai khajna, katba ka jingkhuid jingsuba ha katei ka jaka pat kam don bad wat ka bording ilektrik ha katei ka jaka pynïeng kali ruh kam don satia shapoh kaba la pynlong ïa ki briew ba kin leit shabar kylleng katei ka jaka bad kaba la wanrah pat ïa ka jingsma iwtung.
