Shillong, Nailar 17
U Symbud Myntri Rangbah ka jylla, Bah Sniawbhalang Dhar u la ong ba kum ki nongïalam ki la trei ïa ka kam bad ba kin sa shim ïa ka rai kaba bha tam na ka bynta ka bit ka biang jong ki paidbah. Kumta kam long kaba dei ban pynphai nia ne kynthoh halor ka jingbyrngem jong ki riewpaidbah.
Lah ban pynkynmaw ba ha ka Sngi Balang, ka Regional Committee jong ka West Jaiñtia Hills ba la khlieh da u Bah Sniawbhalang Dhar kum u Chairman lem bad ka Regional Committee ka West Karbi Anglong District (WKAD) ba la khlieh da u Pijush Hazarika kum u Chairman, ki la hiar sha Khanduli ban pynlong ki jingïalang bad sngap thuh ïa ki jingeh jong ki nongshong shnong na baroh arliang.
Na ka liang jong ka Karbi Students Association (KSA) lyngba u nongïalam jong ka, u Mirjeng Kro ruh ka la byrngem bad maham lypa da kaba ong ba lada kin duh ïa ka jaka jong ki sha ka Meghalaya, kane ka thaiñ kan sa long bad jia kumba jia ka Manipur.
Ha kaba ïadei bad kane ka jingbyrngem ka KSA, haba twad jingmut na u Symbud Myntri Rangbah ka jylla, Bah Sniawbhalang Dhar u la ong, ka jingleit jong ki Regional Committee jong ki ar tylli ki jylla sha ka shnong Khanduli ka long ban pynneh bad pynrung ha ki nongshong shnong ïa ka shongsuk shongsaiñ, ban peit bad wad kiei kita ki jingeh kiba hakhmat eh bad ruh ban shim jingmut na ki nongshong shnong halor ka jingkwah bad angnud ka jong ki.
“Ki briew ki don ïa la ki jong ki dur bad ki jingmut bad kumta mano-mano ruh la u dei u A, B ne C ki don ïa ka jinglaitluid ban kren bad pynpaw ïa la ka jong ka jingsngew, hynrei kum ki nongïalam kam long pat kaba dei ban pynphai nia ne kynthoh eiei halor kata,” la ong u Bah Sniawbhalang.
“Kum ki riewpaidbah ki don ïa ka hok ban kren laitluid ïa kaba ngim lah ban khang, hynrei lada nga sngap bad ngan pynphai nia ne kynthoh halor kane, ka lah ban jia eiei pat, kumta ngim dei ban sngewpher halor kum kine ki jingkren kynthoh, namar kum ki nongïalam ngi la sngewthuh ïa kaei kaba ngi dei ban leh bad ba ngin shim ïa ka rai kaba bha tam na ka bynta ki paidbah,” u la ong.
