Shillong, Nailar 17
U Lat ka Jylla u la ai ka jingmynjur bad soi ïa ka Market Bill jong ka Khasi Hills Autonomous District Council ba kan long aiñ noh bad tip mynta kum ka KHADC (Establishment, Management and Control of Markets) (Second Amendment) Regulation, Act 2021.
Ka jingai jingmynjur jong u Lat ïa kane ka Bill ba kan long aiñ noh, ka la aibor mynta ïa ka KHADC ban tehlakam ïa ka dor ka mur jong ki mar rep lane kiwei kiwei ki jait mar kynthup ïa ki jingri hapoh ki ïew ki hat kiba hap ha u pud u sam jong ka.
Haba kren sha ki lad pathai khubor ha ka Sngi Palei, ka Executive Member (EM) ka Khasi Hills Autonomous District Council (KHADC) kaba khmih ïa ki ïew ki hat, ka Kong Grace Mary Kharpuri ka la ong ba ka District Council mynta kan pyntreikam noh pura ïa kane ka aiñ na ka bynta ban ïada bad ai jingmyntoi ïa ki paid nongrep.
“Ka dei ka kamram ka jong ngi ban pynmih ïa ka jingpynbna paidbah bad ban pyntreikam noh mardor ïa katei ka aiñ bad kane ka aiñ kan treikam ha baroh u pud u sam jong ka District Council,” la ong ka Kong Grace.
Haba pynpaw ïa ka jingkmen halor ka jingai jingmynjur jong u Lat ïa kane ka bill ban long aiñ, ka Kong Grace ka la ïathuh ruh ba mynta ka Council ka lah ruh wat ban tuklar wat ïa ka dor ka mur khnang ba ki nongrep kiba wan die ïa ki mar kin ym shah khñiot dor.
Ka la ïathuh ruh ba kan don ka komiti ba kyrpang ka ban tip kum ka ‘Agricultural Produce and Livestock Marketing Facilitation Sub-Committee ka ban peit ïa ka jingpyntyllun ïa kane ka kam.
Ym tang katta, ka la ïathuh ba katei ka sub-committee kan peit ruh ba ka dor ka mur kan ym dei ban long hapoh ïa ka dor kaba la buh da ka Council.
Nalorkata, ka la ïathuh ruh ba da ka jingpyntreikam ïa katei ka aiñ kan ym don shuh kata ka jingot kilo kyllum ïa ki mar rep kumba la ju khñium da ki nongrep baroh shi katta haba ki leit ban die jingdie ha ïew nalor kiwei kiwei ki kyndon kiba bun.
Ka la pyntip ruh ba ka sub-committee kan sa thew sa woh ha kaba ïadei bad ka jingthied jingdie ïa ki mar rep kaban long katkum ka Minimum Support Price kaba la buh da ka District Council na ka por sha ka por.
Namar kata, ka la ong ba katei ka aiñ ka long ka jingkyrkhu kaba khraw ïa ki nongrep ha kaba yn shimkhia ïa kiba bun ki jingeh kiba mad da ki nongrep kynthup halor ka jingshah ot kilo ki mar rep bad kan shimkhia ruh ha kaba ïadei bad ka bha ka miat jong ka jingdie ïa ki jingri.
Ïa katei ka aiñ kaba la mynjur da ka KHADC ha ka 2 tarik Lber, 2021 ka la ïoh ïa ka jingmynjur na u Lat ka jylla ha ka 26 tarik u Naitung mynta u snem.
Ka jingthmu jong katei ka aiñ ka long ban kyntiew bad ban plie lad ban pynïaid ïew ïa ki mar rep bad ïa ki jingri bad ban don ruh ka jingkhuid jingsuba ha ka jingpyntreikam ïa katei ka kyndon aiñ.
Ka EM ka la pyntip ruh ba hadien ba la pyntreikam pura ïa kane ka aiñ, lada lap ïa kito ki nongdie ne ki mahajon kiba leh pyrshah, kan don ka jingshah daiñ kuna kaba kot sha ka T.10,000 nalor kiwei pat ki lad pynshitom.
Ka EM ka la ai khublei kyrpang ïa u CEM, Bah Pynïaid Sing Syiem lem ka EC, kumjuh ruh ïa ka EC barim ba la lamkhmat da u Bah Titosstarwell Chyne bad ruh ïa ka tnat DCA ka sorkar jylla hapoh ka jingïalam jong u Bah Prestone Tynsong kum u Myntri, kiba la shimkhia bad trei shitom ban pynurlong ïa kane ka jingthmu jong ka council.
