Shillong, Nailar 20
Kum shibynta ka jingrakhe ïa u mawmer ba 25 snem lane ka jubilee rupa jong ka Dorbar Shnong Mawkhar, ka Seng Samla Mawkhar ha ryngkat ka jingïatreilang bad ka NRE Pageant India Private Limited ha ka Sngi Saitjaiñ ka la pynlong ïa ka prokram halor ka jingpynsngewthuh paidbah halor u drok bad kumno ban thaw ki lad ki lynti ban pyllait ïa kiba la kyrni ha une u jingdih lyngba ka jingpyndonkam da ki dawai kynbat kiba lah ban shna hi la ïing.
Ïa katei ka prokram pynsngewthuh paidbah la pynlong ha ka Community Hall jong ka Mawkhar bad ka kongsan ha kane ka sngi ka dei ka Kong C.D Lyngwa kaba dei ka Director ka tnad Social Welfare.
Haba ai jingkren kum ka kongsan ha katei ka sngi, ka Kong C.D Lyngwa, ka la ong ba katkum ka jingwad bniah da ka tnad ka koit ka khiah kaba dang shu lap shen, ka la lap ba ka jingïap ki longkmie kiba pun bad kiba la dep ban kha khun ka kiew bha namar ba kam biang ka bam ka dih bad ki dawai dashin kiba tei ïa ka met ka phad jong ka. Nangta, ka la ong ruh ba ka jingduk ka dei kawei na ki daw ka jingngop jong ki khynnah ha u drok namar ba kim bit kim biang bad kim don eiei ban leh.
Na ka liang u Bah Truman Basaïawmoit, u la ong ba ki khynnah samla lada ki la sdang ban ngop ha ki jingdih pynbuaid, ki don ïa kata ka jingsngewthuh kaba lah ban ïalam bakla ha kaba ki ju pyrkhat ba lada ki pyndonkam ïa kitei ki jingdih pynbuaid, kan aibor ïa ki ha kiba bun ki liang.
“Hynrei ngi dei ban sngewthuh ba lyndet jong kita, ki don kita ki jingshisha kiba sha lyndet kiba ngi lah ban sngewthuh bad tip bad kumno ba ngin pyndkut ïa kata ka jingngeit biej bad ïa kata ka jingïalam bakla”, la ong u Bah Basaïawmoit.
Ha katei ka sngi la ïoh ruh ïa ka jingkren plie paidbah ïa katei ka prokram na u President ka Seng Samla Mawkhar, u Bah Daniel Syngai, ka jingpynsngewthuh paidbah halor u drok na u Bah Truman Basaïawmoit uba dei u Psychologist, DMPH, EKH, MIMHANS.
Shuh shuh ha katei ka sngi ka la don ruh ka jingpyni kumno ban shna hi ïa ki dawai kynbat ha la ïing na ka bynta kito ki briew kiba la kyrni ha une u jingdih ba la leh da u Tenzing Tsering uba dei u Ayurveda Practitioner Naturopathy na USA, New York bad kiwei kiwei ki prokram.
Ki dawai kynbat ba ki paidbah ki lah ban pyndonkam ha la ïing ki kynthup ïa u Ashwagandha 100 gm, u Ajwain 100 gm, u Cayenne Pepper 30 gm, u Passion Fruit Seeds ne ki shyieng jong u sohbrap 10 gm bad ki sla jong u Stevia 5 gm.
Na ka bynta ka jingïasyllok ne ‘Counselling’, ki paidbah ki lah ban phone ha kine nombar harum: 9436307269 bad 9436175848.
Katba na ka bynta kitei ki dawai kynbat, ki paidbah ki lah ban phone ïa kine ki nombar 9436304756 bad 7005883606. Kino-kino ki shnong kiba kwah ban don kum kine ki prokram, ki lah ban phone ha kine ki nombar 9774454872 bad 8257920588.
