New Delhi, Nailar 20
Ka pla Ïarong kaba ju pyndonkam bha da ki Khasi ha ki por mynshwa ka la poi sha nongbah Delhi ban pyni ïa ka rukom thaiñ lyngba ki longkmie Khasi kiba la wan ban ïashimbynta ha ka tamasa sohtrun kaba la pynlong ha Dilli Haat naduh ka 18 tarik haduh 20 tarik Nailar, 2023.
Napdeng ki dukan kiba la buh khnang ban pyni ïa ki tiar ki tar ba thaiñ kti lane dakti, ka dukan kaba thaiñ ïa ka pla Ïaïong ka dei kawei kaba la khring bha ïa ki paidbah ban wan peit bad kylli jingtip.
Ha kane ka dukan, ki shong ki longkmie Khasi ha kaba ïa ka pla Ïarong la thaiñ da ka Kong Phrim bad Kong Sphir kiba dei na ka shnong Tynrong kaba na thaiñ Sohra, East Khasi Hills district. Ha kane ka dukan ki donlang ruh ki longkmie kiba thaiñ ksah bad kynja syntiew na ki siej.
Ka shnong Tynrong ka dei tang maka kaba ki dang don kiba thaiñ ïa ka pla Ïarong. Ïa kane ka pla kaba ju pyndonkam bha da ki Khasi naduh hyndai hynthai, la thaiñ da kaba pyndonkam ïa u ksai ba la thir na u sla sohtrun shiah.
Ka shnong Tynrong ka dei kaba dang pynneh pynsah ïa kane ka pla tynrai kaba naduh hyndai, bad kane ka pla ka dei kaba itynnad bha ynda la dep thaiñ da une u ksai sohtrun shiah.
Katkum ka jingbatai ka Kong Phrim, la ong ba ïa u ksai ban thaiñ ïa ka Ïarong lah ban thir tang na u sla sohtrun shiah kaba ha ka ktien nongwei la khot kyrteng “wild pineapple.” Une u sohtrun shiah u dei uba pynmih soh kum kiwei pat ki jait sohtrun, tangba u sohtrun shiah um da bang bad biang ka jingmad kum kiwei pat ki sohtrun.
Ha shnong Tynrong ki dang bun kiba thaiñ ïa ka Ïarong, bad ïa une u sohtrun shiah ruh la thung khnang da ki nongshong shnong khnang ban ïoh thir ksai ban thaiñ ïa kane ka pla barim bajah kaba la jan duhjait noh.
Ka Kong Phrim ka la ong ba na u ksai sohtrun shiah, lah ban thaiñ ym tang ïa ka Ïarong, hynrei ïa kiwei ruh ki jingthaiñ kum ki syntiew bad kiwei kiwei.
Na ka liang ka Sorkar Jylla ruh ka la shimkhia ban pynneh ïa kane ka rukom thaiñ pla ki men barim bad ka la jied ïa ka shnong Tynsong kum ka nongmuna ban hikai ïa kiwei pat ban pynneh ïa ka pla Ïarong bad ka rukom thaiñ kaba la don naduh hyndai hynthai.
Ki don palat 20 tylli ki dukan kiba la plie ban die ïa ki mar bam, ki tiar ki tar ba thaiñ da ki briew ka Meghalaya nalor ki jingbam kiba la shna na u sohtrun, kum ka jam, biskit bad kiwei kiwei ki jingbam nalor ki dukan kiba die bad ai mad ïa u sohtrun sha ki paidbah kiba wan sha ka tamasa ha Dilli Haat.
Ïa kane ka tamasa la pynkut noh ha ka Sngi U Blei bad kane ka tamasa ka la ïoh jingïaroh na ki paidbah ka nongbah Delhi bad ki briew kiba wan na kylleng khamtam hadien ba ki la ïoh ban mad bad thied ïa u sohtrun ba wanrah na Meghalaya ban pyni bad die ha kane ka tamasa.
U sohtrun na Meghalaya la tip kum u ‘Kew’ bad u dei uba kham pher na kiwei pat ki jait sohtrun ha ka jingmad bad jingthiang.
Ka tnat ka rep ka riang ka la wanrah palat 7 metric ton u sohtrun sha kane ka tamasa bad baroh u sohtrun u la lut ha kane ka tamasa namar ka jingtuid ki paidbah ban wan mad bad ban thied ïa u soh.
