Shillong, Nailar 21
Kawei ka dur-khih ne video ka la saphriang sted bha haba ïadei bad kawei ka jingjia ha nongbah Shillong ha kaba la mih ka jingïania kaba khluit hapdeng ki pulit pynïaid kali ka nongbah Shillong bad ki nongñiah kali kamai ha thaiñ Khyndai Lad. Ha kane ka jingïania la ïohsngew ruh ba ki nongñiah kali kamai ki la khot sin ïa uwei u pulit pynïaid kali da ka kyrteng “Dabangg” bad ki la kynnoh ba ki don katto katne ki pulit pynïaid kali kiba ju pyndait tham lane ‘clamp’ ïa ki kali kamai tang ban dawa pisa bad daiñ kuna khlem nongrim.
Ha kane ka jingïania, ym lah satia ban sngewthuh bad tip shai, balei kine ki nongñiah kali ki khot sin da ka kyrteng “Dabangg” haba ki phah khot ïa uta u pulit, namar lada dei ba pynwan na ka phlim Hindi kaba kyrteng “Dabangg”, ha ka jingshisha u pulit uba donbynta ha ka phlim “Dabangg”, u dei uba don la kajong ka rukom treikam ban ïakhun pyrshah ïa ka bamsap.
Ha kane ka dur-khih kaba la saphriang kylleng lyngba ka social media WhatsApp, la ïohsngew ba ki nongñiah kali ki kynnoh ba u don u pulit pynïaid kali uba dawa pisa 200 tyngka bad u ju pynkhap tham ïa ki kali kamai man la ka por.
Kine ki nongñiah kali ki la ong ba ka kamram ki pulit pynïaid kali ka long ban beh bad ban nym pynïeng slem ki kali, hynrei ym ban pyndait da ka tham. La ïohsngew ruh ba ki nongñiah kali ki la pyrta ban phah khot ïa uwei u pulit da kaba ong “khot ïa u Dabangg” da kaba kynnoh ba u ju pyndonkam da ki ktien khlem akor bad ki ’tien sih ’tien sang.
Shuh shuh kine ki nongñiah kali kamai kiba la ker tawiar ïa ki pulit pynïaid kali, ki la buh jingkylli ïa ki pulit kiba donlang ha ka por ba ki ïania, da kaba ong, kumno ïa ki kali shimet, ki pulit ki khlem pyndait tham, hynrei ki kloi ban pyndait tham ïa ki kali kamai bad kane ka ktah ïa ki nongñiah kali kiba kamai ban pyndap ïa ka ïing ka seng bad man ka por ki hap ban siew ïa ka kuna man ka por sha ki pulit.
Lah ban kdew ba ka Khyndai Lad ka dei ka jaka kaba khapngiah bha ha kaba ki kali kamai naduh ki bos saw ki ju ïeng nalor ki taksi bad ki kali kamai kiba ju leit kamai na Shillong sha Guwahati bad kiwei kiwei ki jaka.
