Shillong, Nailar 21 (UNI)
Ka jingdon jong ki briew kiba shah ktah ha ka jingpang khmat ne ‘Conjunctivitis’ ka la sdang ban kiew hapoh ka Jylla, ha kawei ka liang kaba la pynlong ïa ki bor ba dei khmih ka koit ka khiah ban pynmih ïa ki jingai jingmut sha ki paidbah ban ïada na ka jingsaphriang jong kane ka jingpang.
Ki ophisar ka koit ka khiah ki la ïathuh ba haduh mynta, ki don 1,324 ngut kiba shah ktah ha katei ka jingpang hapoh ka Jylla. Ha East Khasi Hills kaba kynthup ïa ka nongbah Shillong ki don 672 ngut kiba shah ktah ha ka ‘Conjunctivitis’ ha kine ki khyndiat bnai ba la dep.
Ha u Naitung, ki la don 552 ngut kiba shah ktah ha katei ka jingpang, katba ki don 120 ngut kiba shah ktah tang ha une u bnai. Kane ka long katkum ki jingtip na ka shlem treikam Directorate of Health Services.
Napdeng kito kiba shah ktah naduh u Naitung haduh ka 21 tarik mynta u bnai, 333 ngut ki dei na West Garo Hills, 155 ngut na West Jaiñtia Hills, 73 ngut na Ri-Bhoi, 47 ngut na West Khasi Hills, 36 ngut na South Garo Hills bad 8 ngut na East Garo Hills.
Ki la don ruh katto-katne ki skul kiba la khang shi por khnang ban tehlakam ïa ka jingsaphriang jong kane ka jingpang ha Ri-Bhoi.
Na ka liang ka shlem treikam District Medical & Health Officer (DM&HO), East Khasi Hills District ka la bthah ba kito kiba shah ktah ha ka jingpang khmat ne ‘Conjunctivitis’ kim dei ban leit skul, kolej, ophis katba ka jingsaw ha ki khmat kam pat duna.
“Namar ka jingsaphriang sted ha ka jingdon ki nongpang ha kylleng ka distrik kiba shah ktah ha ka jingpang khmat ne ‘Conjunctivitis’ bad namar ka bha ka miat jong ka koit ka khiah ki paidbah, ka shlem treikam DM&HO, East Khasi Hills District ka la pynmih ïa ki jingai jingmut ha ka liang ka koit ka khiah kum shi bynta ban khang lad ïa ka jingsaphriang jong kane ka jingpang,” la ong ka DM&HO ka EKHD, Dr. A. Lyngdoh ha ka kyrwoh khubor.
Ka ‘Conjunctivitis’ ka dei ka jingpang ïabit bad ka saphriang sted na iwei sha iwei pat da kaba ktah ïa ka um kaba mih na khmat jong kiba ïoh ïa katei ka jingpang ne lyngba ki tiar ki tar ba la ktah da ki nongpang.
Ki dak ki shin jong kane ka jingpang ki kynthup ïa ka jingsaw bad jing-at ha ki khmat, ka jingmih um, jingpang bad jingdait (ha ki khmat), ka jingshitom ban peit ïa ka jingshai bad ki irmat ki lah ban dambit lang ha ka por mynstep.
“Ka ophis kumta ban khang lad ïa ka jingsaphriang jong kane ka jingpang ka ai jingmut ïa ki paidbah ban long kiba leh khuid leh suba da kaba sait ïa ki kti da ka sabon na ka por sha ka por bad lada jia ba shah ktah ha ka jingpang, dei ban set slung ïalade ha ïing bad ban kiar ïakynduh ïa kiwei pat tat ynda la khuid lut ka jingsaw ha ki khmat,” la ong ka Dr. Lyngdoh.
Ka DM&HO ka la ong ruh ba lada ki dak ki shin ki neh palat ïa ka 5 sngi ne ka don ka jingduna ha ka bor ïohi, ka jingpang bym lah shah, ka jingbym lah peit ïa ka jingshai bad ka jingmih eitmat ba rben, kata dei ban leit mih mar-mar sha u doktor.
Nalor kine, ka la kdew ba dei ban kiar na ka jingshim ïa ki tiar shimet kumjuh ban kiar na kaba ktah ïa ki khmat.
Ha kajuh ka por, ym dei ban pyndonkam satia ïa ki ‘Contact Lenses’.
Shuh shuh ka la bynrap ba lada shah ktah ha katei ka jingpang, kata ym dei ban leit sha skul, kolej, ophis tat ynda ka jingsaw ha ki khmat ka la duna.
