Shillong, Nailar 21
Ka tnad Public Health Engineering (PHE) ka la sdang ïa ka ‘Water Guardians: Strengthening Sustainable Communities Campaign’, ka sienjam hapoh ka Jal Jeevan Mission (JJM) kaba thmu ban pynithuh ïa ki shnong hapoh ka Jylla kiba la ting ïa ka jinglong ba kyrpang ne kiba la trei minot haba phai sha ka jingkynshew bad jingpynlang ïa ka um hapoh ka imlang-sahlang.
Kane ka lynti ka dei ka sakhi ïa ka jingtrei minot ka Jylla ha ka ban kyntiew ïa ka lawei jong ka jingriewspah ka um ha ka rukom kaba lah ban pynneh-pynsah ïa ka.
U kongsan ha kane ka sngi, Myntri ka tnad PHE, u Marcuise N. Marak, u la plie ïa kane ka prokram ha ryngkat ka jingdonlang u symbud kongsan, Commissioner & Secretary, PHE, uba dei ruh u Mission Director ka JJM, u Syed Md. A. Razi, Chief Engineer, PHE, Kong B.M. Lyndem lem bad kiwei-kiwei ki ophisar ka tnad.
U Myntri u la ban jur halor ka jingdonkam na bynta ka jingtrei minot haba ïadei bad ka rukom pynneh-pynsah ïa ka um, kumjuh ban leh katba lah ban pynlang um bad ban pyntikna ba ki tyllong um ki long kiba dap ba biang.
U la bynrap ba katei ka prokram ka dei ka sienjam ha ka lynti kaba dei namar ka mih na katto-katne ki bynta ba kongsan kiba ban jur ïa ka jingdonkam ha ka ban pynlang bad pynneh-pynsah ïa ka um hapoh ka Jylla.
Na ka liang u Myntri u la kyntu ruh ïa ki paidbah ban ïatreilang ha ka ban pynlong ïa ka lawei ka Jylla kaba shngaiñ ha ka liang ka um ka wah.
Kane ka prokram ka kynthup ïa ka nongrim jong ka jingpynlang bad jingpynneh-pynsah ïa ka um bad thmu ban burom ïa ka buit ne jingwanrah bathymmai, ka jingïadon bynta jong ka imlang-sahlang bad ban pynneh ïa ka jingminot kaba ki shnong ki la pyni ha ka ban ïada ïa ki tyllong um.
