Shillong, Nailar 22
Wat la ki bahaïing ki la suba ba ka jingkhlad u Bah Rishadsing Kharmutee, 37 snem ka rta ka lah ban dei ba u shah pynïap namar ïa ka met la lap na nala hajan Them Bijoy. Hynrei na ka liang ki pulit ruh ki khlem buddien shuh haba ïadei bad kane ka jingjia hadien ba ki bahaïing kim kwah shuh ba kin buddien hadien ba ki la dep ujor ejahar ha Cantonment Police Beat House.
Haba pyrshang ban ïakren bad ki bahaïing hasem jong u Bah Rishadsing ki la ïathuh ba haduh mynta kim shym la ïoh jingtip ba ki pulit kin wan ban shim jingbatai na ki bahaïing hadien ka jinglap ïa ka metïap na nala ha Them Bijoy.
Ki bahaïing ki la pynpaw ba ka jingbym buddien shuh ki pulit ïa kita kiba leh ïa une u rangbah kumba ki shu suba, ka lah ban dei ba ki pulit ruh kim kwah shuh ban wad namar ki bahaïing ki la hun haba ki la ïoh ïa ka metïap jong u Bah Rishadsing.
Kum ban shu pynkynmaw ki bahaïing ki suba ba lah ban don ki briew kiba leh sniew ïa u namar ïa ka met la lap na nala kaba la tuid da ka um, nangta ka pisa ruh kam don shuh ha ka met jong u.
Kum ban shu pynkynmaw u Bah Rishadsing u la mih na ïing ha ka por 9 baje mynstep jong ka 11 tarik mynta u bnai ban leit die sying kumba 2 mon sha Ïewduh, hynrei naduh katei ka sngi um shym la wanphai ïing shuh.
Haba ki bahaïing ki la leit pyntip noh sha ki pulit ha ka 12 tarik u juh u bnai namar ka jingjah jong u, ki pulit ki la lap ïa ka metïap ha ka janmiet jong ka 14 tarik mynta u bnai.
Hadien ba la dep ‘post mortem’ ha Civil Hospital Shillong ki bahaïing hasem ki la leit ontep noh ha ka 15 tarik mynta u bnai ha Mawdiangdiang, New Shillong.
