Shillong, Nailar 23
Hadien ka jingud jingnam jong ki nongleit nongwan kiba mad jingeh na ka jinglong jingman jong ka surok kaba dang pyntrei ban pynheh na Wah Umpamtiah shaduh Weiloi ha East Khasi Hills, ha ka sngi Balang ki lai ngut MLA ki la hiar lang ban jurip ïa ka bynta jong kane ka surok.
Ka jingud jingnam jong ki nongleit nongwan ka long halor ka jingktieh bad bun ki thliew ki syar nalor ka jingpynhap mawria kaba long harud surok kaba la pynwit ïa ka leit ka wan.
Ha kane ka jinghiar jurip jong ki lai ngut ki MLA ba kynthup ïa u MLA ka Mawphlang Bah Mathew Beyondstar Kurbah, MLA ka Mawsynram Bah Olan Sing Suin bad MLA ka Ranikor Bah Pius Marweiñ la synran lang ruh da ki karikor ka PWD kata u SE ka PWD Eastern Circle Bah AB Umdor, Bah A Syiemlieh, Executive Engineer PWD Mawphlang Division, Bah K Kharsyntiew lem ki kontraktor ba pyntrei ïa ka bynta jong katei ka surok.
Ka jingsniew ha ka bynta jong kane ka surok ka dei namar ba ka la don hapdeng ka jingpyntrei ban pynheh, kata ban kyntiew kyrdan na ka Single Lane sha ka Intermediate Lane, kaba la mang ha ka jinglut kaba la kot sha ka T.49 klur, kaba dei naduh Wah Umpamtiah haduh Weiloi ha ka jingjrong kumba 28.90 kilometer kaba la aiti sha ar ngut ki kontraktor ban pyntrei.
Kumba ka long, ka jingpyntrei ïa kane ka surok kaba la sdang naduh u Kyllalyngkot mynta u snem. Ka kam ka la dep kumba 20% bad ka por ba la buh ban pyndep ka dei haduh u Kyllalyngkot jong u snem 2025. Kane ka surok kaba mynta ka don ïa ka pyngkiang kumba 3.75 meter bad kumta ka jingpynheh kan long sha ka 5.5 meter. Kumta na ka liang ka PWD kan hap ban shim jaka bad mait ïa ki lum ne tei kynroh ban pynbit pynbiang ïa ka surok.
Haba kren sha ki lad pathai khubor hadien ba la dep ban jurip ïa kane ka surok, na ka liang jong kitei ki MLA ki la pynpaw ba ka jingwan hiar ban peit da la ki jong ki khmat, ka long hadien ba ki la ïoh pdiang ki jingujor na ki nongleit nongwan halor ka jingsniew kaba la buh jingeh ïa ka leit ka wan ka jong ki.
Kine ki nongmihkhmat na kitei ki 3 tylli ki konstitwensi ki la pynpaw ka jingkmen halor ka jingïohi ba ka kam ka la ïaid shakhmat wat hapdeng katto katne ki jingeh ba ïadei bad ka jingshim jaka ban pynheh ïa ka surok, kaba ki la kyrmen skhem ba ka tnat PWD kan sa lah ban pynbeit.
Ki la kyrpad ruh ïa ki nongleit nongwan ba kin ïai shah lem shipor namar ka jingwanrah ïa ka roi ka par kam mut ba mar ïa wanrah kan bha beit naduh kaba sdang, hynrei haba pynbha ne pynheh surok, kan hap ban don ruh ka jingpynjot pynpra bad kumta hap ban ïai shah shipor ban suk pat ha ki por ban wan.
