Shillong, Nailar 23
Ki nongdie jaiñ ha Khasi Market kiba dang shu wan shong thymmai kaba don hajrong ka jaka ïeng kali Bhoi ki la mad jingeh shi kat dei namar tang shu slap jur ka um ka la jaw ha jaka ba shong die jaiñ. Ïa kane la sakhi naduh ba ki sdang leit kynriah ha katei jaka ha ka 21 tarik mynta u bnai na khrum ka jaka ïeng kali taksi Jaïaw kaba don ha Motphran pyrshah ïa ka Synod Complex.
Ha ka jingjurip ïa kane ka jaka die jaiñ kaba thymmai la ïohi ba ki don ki dukan ki bym pat biang ka bording, ka don ka jaka ba pynïaid ki waïar bording hajan ka kynroh kaba don jingma lada ïaid briew.
Na ka liang ki nongdie jaiñ ki la pynpaw ba mar shu wan shong ha kane ka jaka kaba thymmai ha Garikhana ka hiar bha ka ïew die jaiñ namar ki paidbah kim pat tip bha ïa ka jaka.
Haba ïakren bad ka Secretary ka Synjuk Nongdie Jaiñ Khasi Market, ka la ïathuh ba ka la pyntip sha ki bor pynïaid ka municipal ba ka don jingthut ha ka bording ba kin wan ban shna noh ïoh mynsaw kiba wan thied jaiñ ne ïa ki nongdie jaiñ.
Ka la ïathuh ba ka ïew ka dang duna bha namar ki dang kynriah jaka thymmai ba ki paidbah kin ithuh. Namarkata, ka don jingkyrmen ba ki paidbah kin sa tip suki-suki.
Nalor kata, ka Kong Larisuk Rani ka la ïathuh ba shwa ban mih na kane ka jaka kaba shong ha jaka ïeng kali Jaïaw ki la dep ïasoi ïa ka soskular bad ka municipal ba ynda la dep shna ïa ka jaka ïeng kali kaba saw mala kin ïoh ban wan shong die jaiñ biang.
Ka la ïathuh ba ha u bnai Jymmang 2023, ka municipal ka la phah jingtip ban phah mih noh na kane ka jaka, hynrei ki la leit pan por bad sa kawei ruh kine kiba shong die dukan kim shym la tip eiei.
Kumta hadien ba kine kiba shong dukan ki la ïoh lang ïa ka jingtip ban phah mih noh shipor ki la pdiang ban lum ban lang ïa ki tiar noh naduh ka 14 tarik mynta u bnai bad baroh shi taïew kin bunkam ban rah ïa ki jaiñ sha Garikhana.
