New Delhi, Nailar 23
Ka India ka la long ka Ri banyngkong ha pyrthei ban hiar ha ‘South Pole’ jong u Bnai ha ka Sngi Balang hadien ba u Chandrayaan-3 u la ïoh ban ïuh ha u Bnai hadien shi bnai tam naduh ba ka Indian Space Research Organisation (ISRO) ka la pynher ïa u Chandra-yaan-3 na ryngkew ban leit sha u Bnai.
Kane ka jingjop jong ka Ri ka la wanrah ïa ka jingkmen ha India baroh kawei kaba dei na ka jingtrei shitom ki stad ki jhad kiba trei ha ISRO.
Ha kane ka sngi, u Myntri Rangbahduh ka ri, u Narendra Modi u la ïashim bynta lang bad ka kynhun ISRO lyngba ka ‘Video Conferencing’ ban peit ïa ka jinghiar jong u Chandrayaan-3 ha ka sla khyndew jong u bnai mynta ka sngi.
Mar syn hiar u Chandrayaan-3, u Myntri Rangbahduh u la ai jingkren ïa kane ka kynhun bad u la kitbok kitrwiang ïa ki na ka bynta kane ka jingjop kaba kyrpang.
U Myntri Rangbahduh ha ka jingkren ïa ka kynhun kum ki bahaïing jong u, u la ong ba kum kine ki por kiba kyrpang ki sah shirta ha ka jingmut jingpyrkhat jong ka ri.
“Kane ka por ka dei ka bym lah ban klet bad ka bym pat ju jia. Ka dei ka por jong ka jingkhot jong ka ‘Viksit Bharat’, ka jingjop jong ka India, ka dei ka por jong ka jingjam ïa ki jingjynjar bad ka jingïaid ha ka ‘Chandrapath’ jong ka jingjop. Kane ka dei ka por jong ka jinglah treikam jong 140 klur ngut ki briew bad ka jingskhem jingmut jong ka bor bathymmai jong ka India. Kane ka dei ka por jong ka jingkhie ka jingriewspah jong ka India,” la ong u Myntri Rangbahduh ïa ka ri baroh kawei.
“Ha ka jingshai ba nyngkong jong ka ‘Amrit Kaal’, kane ka dei ka ‘Amrit Varsha’ jong ka jingjop,” la ong u Modi uba dap da ka jingkmen.
U Myntri Rangbahduh u la pynkynmaw ïa ki ktien jong ki stad saïan da kaba ong, “Ka India mynta ka don ha u bnai!” bad bynrap, “Ngi la ïoh ïa ka jingher kaba nyngkong jong ka India kaba thymmai.”
U la ong ba mynta u don ha Johannesburg ban ïashim bynta ha ka ‘BRICS Summit’ hynrei ki jingmut jingpyrkhat jong u ki don ha u Chandrayaan-3 kumba long baroh ki briew jong ka India. U la ong ruh ba baroh ki briew jong ka India ki rakhe ïa kane ka sngi.
Ha kajuh ka por, u la kitbok kitrwiang ïa ka kynhun ‘Chandrayaan’, ISRO bad baroh ki stad saïan jong ka ri kiba la trei shitom da ki snem bad u la kitbok kitrwiang ruh ïa ki 140 klur ngut ki briew jong ka ri ha kane ka sngi kaba dap da ka jingkmen.
“Ka India ka la poi sha ka South Pole jong u bnai kaba kiwei-kiwei ki ri kim lah ban poi bad kane ka long namar ka jingtrei shitom bad ka jingtbit jong ki stad saïan jong ngi,” la ong u Myntri Rangbahduh.
U la ong ba baroh ki khana tynrai shaphang u bnai mynta kin kylla bad ba kine ki khana mynta kin don ka jingmut kaba thymmai.
U la kren ruh shaphang ka khana tynrai jong ka India kaba ong ba ïa ka pyrthei la kheiñ kum ka ‘Maa’ bad ïa u bnai la kheiñ kum u ‘Mama’ bad u la ong ba ka don ka jingsngew ba u bnai u long uba jngai bad ba ki briew ki ju ong ‘Chanda Mama durke’, hynrei shen ki khynnah kin sa ong ‘Chanda Mama ek tour ke’ lane u bnai u long tang katto-katne ka jingjngai.
“Ka ‘Moon Mission jong ngi ruh ka don ha ka nongrim jong kane kajuh ka rukom treikam na ka bynta ka bha ka miat jong baroh ki briew. Kumta, ka jingjop ka dei jong baroh ki briew. Ka India kan ïarap ïa ki ‘Moon Mission’ jong kiwei-kiwei ki ri ha ki por ban wan,” la ong u Modi.
Shuh shuh u Myntri Rangbahduh u la ong ba u ngeit skhem ba ki jingjop jong ka ‘Chandrayaan Maha Abhiyan’ kin rah ïa ka jingher jong ka India sha palat u bnai.
“Ngin peit ïa ki jaka ba jngai tam jong ka ‘Solar System, bad ngin trei ban pynurlong ïa ki lad jong ka ‘Universe’ na ka bynta ki briew,” la ong u Modi.
U Myntri Rangbahduh u la kren shaphang ka jingbuh ïa ki thong kiba heh ha ki por ban wan bad u la ïathuh ba ka ISRO shen kan sdang ïa ka ‘Aditya L-1’ Mission ban peit bniah ïa ka sngi. U la ong ruh ba u ‘Venus’ u long uwei na ki thong jong ka ISRO.
“Ka India ka pyni man ka por ba ka suiñbneng kam long u pud,” la ong u Myntri Rangbahduh da kaba kdew sha ka ‘Mission Gaganyaan’ ha kaba ka India ka la khreh ban phah ïa ki briew ha ka jingpynher liengsuiñ sha ka haw-haw.
