Shillong, Nailar:
Ka Khasi Students’ Union (KSU) Wahthapbru Unit ha kane ka sngi jong ka 23 tarik u Nailar 2023 ka la pynpaw ïa ka jingkynmaw burom ïa ka lyngkhuh sngi ïap kaba 23 snem jong ki arngut ki nongïalam ba shitrhem jong ka seng kiba kynthup ïa u samla Dawanbiang Shullai, Assistant Finance Secretary ka KSU, CEC bad u samla Rocky Shylla, Sports Secretary ka KSU Wahthapbru Unit kiba la kyllon ïap ha ka ktang suloi ki pulit ka jylla Meghalaya.
Kum ban shu pynkynmaw, kitei arngut ki nongïalam ba shitrhem jong ka KSU ki lah shah bthat jubor ïa ka jingim ha ki pulit ka jylla Meghalaya ha ka 23 tarik u Nailar 2000 kaba la jia ha Nongshiliang, Shillong katba ki dang ïakynduh lang shiparalok ha kawei ka ïing ha ryngkat ka jingïadonlang u samla Balajied Dkhar ba ju khot sin u Hepkhoit uba dei u dkhot jong ka seng kieng atiar ka jylla, ka Hynñiewtrep National Liberation Council (HNLC). Hynrei kum ha katei ka por kyndit-kynsan ki pulit ka jylla Meghalaya ki lah wan ban khynra ïa katei ka ïing bad ki lah shu synreit kuli naphang ïa kitei ki laingut ki samla Khasi da ka jingsuba ba ki dei ki dkhot jong ka kynhun lehnoh NSCN-IM.
Kumta ha kane ka sngi, na ka liang ka KSU Wahthapbru Unit ka pynpaw ïa ka dak ka jingkynmaw burom ïa kitei lai ngut ki samla. Ha kajuh ka por ka seng KSU ka pynpaw ruh ba kane ka dei ka sngi kaba dum tam ïa ka Jaitbynriew bad kum ka seng da lei lei kam lah ban shu klet noh ïa ki dak mong kiba la kylla sohkhliang.
Na ka liang ka seng ka la ong ruh ba shijunom kan ïai pyrto nam ban pynsah jingkynmaw ïa ki nongïalam bad ki dkhot ba ha shuwa jong ki kiba la pha ïa la ka jingim na ka bynta ka dawbah jong ka Ri bad ka Jaitbynriew.
Katkum u kyrwoh ba la phah da ka seng KSU Wahthapbru Unit ka la ong, “Ngi ïohi ruh ba haduh kat kine ki sngi, na ka liang ka tnat pulit, ki da thrang eh hir-hir ban khylliap lama noh ïa ka seng KSU da ka jingpharep ba har rukom bad da ka jingpyrshang ban pyntieng koh tympan ha kiba bun ki liang ïa ki dkhot da ka jingbom jingtied, ka jingset patok bad wat haduh ban shim syndon ïa ka jingim jong ki dkhot ka seng ruh kim salia shuh hynrei kynmaw ba kine kiei kiei baroh kim lah ban pynkhyllem ïa ka jinglong rangbah ka seng bad ka nongrim ba skhem jong ki dkhot”.
