Shillong, Nailar 24
Ki khlieh nongsynshar shnong jong ki 5 tylli ki shnong kiba don hapoh ka thaiñ Tarabari kiba kynthup ïa ka Namtarabari, ka Watre Rongchong, ka Bolsum, ka Damrangkona bad ka Garojan kiba don markhap bad ka West Khasi Hills, Meghalaya bad kiba dei ki shnong kiba hap hapdeng ka jingïakajia pud hapdeng ka jylla Assam bad ka jylla Meghalaya ha ka sngi Palei ki la leit ban aiti da ka dorkhas hakhmat u Myntri Rangbah ka jylla, u Conrad K Sangma ban kynthup ïa kitei ki 5 tylli ki shnong shapoh ka jylla Meghalaya.
Haba kren sha ki lad pathai khubor, na ka liang kitei ki nongsynshar shnong jong kitei ki 5 tylli ki shnong ki la pynpaw ba hadien ka jingïamynjur da ki arngut ki Myntri Rangbah jong ki artylli ki jylla ba kito ki shnong kiba don hapdeng ka jingïakajia khappud ki lah ban rai sha kano ka jylla kaba ki kwah ban leit. Kumta na ka liang jong ki paid nongshong shnong jong kitei ki 5 tylli ki shnong jong ka thaiñ Tarabari hadien ki jingïalang bapher bapher ba ki la ïashong, ki la shim ïa ka rai ban pynïasnoh bad ka jylla Meghalaya bad la ïai ap khmih lynti da ka jingangnud ban shah kynthup noh shapoh ka jylla Meghalaya.
Na ka liang u Gupta J Sangma, President ka Tarabari Sector, u la ong ba hadien ka jingïasoi ïa ka Memorandum of Understanding (MoU) hapdeng ka jylla Assam bad ka jylla Meghalaya kitei ki 5 tylli ki shnong ki la shah ïehbeiñ ha baroh artylli ki jylla. Kumta u la ong ba kum ki paid nongshong shnong jong kitei ki 5 tylli ki shnong ki kwah ban don hapoh ka jylla Meghalaya.
Na ka liang u Myntri Rangbah u la ong ba un sa khmih biang halor ka jingshim rai kaba khadduh halor kane ka jingkynthup ïa kitei ki 5 tylli shnong shapoh ka jylla Meghalaya.
“Ka jingeh ka jingshitom ïa ka jingim jong ngi kaba ym lah ban kren bad ki khynnah skul kim ïoh ban leit skul namar ba kim biang ïa ki kot ki sla kiba donkam, baroh ki jingdonkam ka sorkar Assam kam ai bad sorkar Meghalaya ruh ka khlem shim bad kam ai ïa ngi kaba pynlong ïa ngi ba ngin jynjar ban im ban sah”, la ong u Gupta Sangma.
Nalor nangta, u Gupta u la ong ba ha ki por kiba la leit, kitei ki 5 tylli ki shnong ki don shapoh ka jylla Assam hynrei ha ka jingïalang jong ka jylla Assam bad ka jylla Meghalaya kaba la long ha ka 12 tarik u Naiwieng 2021 ha Upper Tarabari, ki la shim ïa ka rai bad ki la pynpaw ïa ka jingkwah ban don bad ka jylla Meghalaya.
“Ka sorkar Assam ka la pyllait ïa ngi bad ka khlem shim shuh hynrei ka sorkar Meghalaya ka dang donkam ban shim ïa ngi hynrei ka khlem shim”, la ong u Gupta.
Na ka liang ka Somith K Sangma, President ka Tarabari Regional Unit Border, ka la ong ba kitei ki 5 tylli ki shnong kiba don hapdeng ka jingïakajia khappud ki kwah ban don bad ka jylla Meghalaya. Hynrei hadien ka jingsoi ïa ka MOU hapdeng ki artylli ki jylla, baroh ka roi ka par bad ki jingdonkam la pynsangeh ban ai sha ki kaba la wanrah ka jingjynjar ïa ki khun ki kti bad ïa ka ïing ka sem jong kitei ki nongshong shnong.
