Khliehriat, Nailar 24
Ka jingpynsngew paidbah ha shlem jong ka Meghalaya Cements Limited ha Thangskai, East Jaiñtia Hills ha ka Sngi Palei ka la thap long pynban kum ka thma namar ka jingïakynad kaba shyrkhei kaba la mih hapdeng ki ‘riew paidbah bad ki pulit.
Kane ka jingïakynad ka la pynlong ïa ki pulit ka East Jaiñtia Hills ban pyndonkam da ki dieng sympat, lyer pynsat khmat (Tear Gas) bad ki ‘Stun Grenade’ ban tem ïa ki paidbah kiba la wan ban pynpaw ïa ka jingpyrshah ïa ka projek bathymmai jong ka Meghalaya Cements Limited ha katei ka ‘Public Hearing’.
Kumba 150 ngut ki nongshong shnong jong ka Wahïajer, Chiehruphi bad Thangskai ha ka jingsynran ka Khasi Students’ Union (KSU) Narpuh Circle bad kiwei ki kynhun seng ha ka jingrah ïa ki jingthoh (Placard) ki la lum hakhmat ka khyrdop Meghalaya Cements Limited naduh ka por 8 baje mynstep ban ïashim bynta ha ka jingpynsngew paidbah ba la khot pynlong da ka Meghalaya State Pollution Control Board (MSPCB). Kane ka jingpynsngew paidbah ka dei na ka bynta ka jingthmu jong kane ka karkhana ban pynïar ïa ka jingpynmih dewbilat na ka 2,600 TPD (0.858) sha ka 4,500 TPD (1.485) bad ka 10 MW Captive Power Plant bad ka 9.5 MW Waste Heat Recovery System (WHRS).
Ki paidbah kiba pyrshah ïa katei ka jingïalang ki la thmu ban ïashim bynta, hynrei la khang ïa ki da ki pulit kiba la ap pahara bad ka la mih ka jingïania bad kulmar kaba jur hapdeng ki pulit bad ki paidbah nongpyrshah.
Shuh shuh ki paidbah ki la rung jubor ban ïoh leit sha madan ba pynlong ïa ka ‘public hearing’ bad ki pulit ruh ki la ïaleh ban khanglad ïa ki da kaba pyndonkam da ki lyer pynsat khmat bad sympat lathi naphang khlem kheiñ shuh la ki dei ki longkmie ne khynnah.
Hynrei watla katta ki paidbah kim kynran dien bad ki la ïoh ban rung sha madan ba pynïeng dara bad lynthaw ïa ki shuki, ki miej bad pynpra ruh ïa ka dara bad sangeh noh ïa ka jingïalang. Hangne ruh ka la mih ka thma ktien kaba jur bad ki pulit ki la maham ïa ki paidbah ba kim dei ban pynthut ïa ka jingïalang.
Hadien katto katne por la pynkynriah noh ïa ka ‘Public Hearing’ na madan bol sha Community Hall ka karkhana, hynrei ki paidbah kiba la ïoh jingtip ïa kane ka jingmut barieh jong ki nongpynïaid ka ‘Public Hearing’, ki la wan tur sha Community Hall bad hangne ruh la khanglad biang ïa ki da ki pulit.
Kane ka jingshah khanglad ka la pynbitar shikatdei eh ïa ki paidbah bad hangne ruh ka la mih ka jingpyni bor kaba markylliang. Ki pulit ki la sympat lathi bad siat ïa ka lyer pynsat khmat bad ki ‘Stun Grenade’ bad ki paidbah ruh ki la ïapra noh.
