Shillong, Nailar 25
Ka [24]7.ai kadei ka kompani kaba nyngkong eh ban buh ïa ka ‘International BPO’ kaba la trei kam ha Shillong ha ki ar snem ba la dep. Kane ka kompani ka don ha Shillong Technology Park, Umsawli bad ka la nang ïar naduh katei ka por ha kaba ka long ka jingplie lad plie lynti na ka bynta ki samla ha kylleng ka jylla.
Ka [24]7.ai ka dei ka kompani kaba ai jingthmu ïa ki briew ban long ki nongtrei da ka mon lade lane da ka jingjied lade, ha ryngkat ka rai ban plie lad ban pyni ïa ki sap tynrai kiba ki don ban trei na ka bynta ki 500 tylli ki kompani ha kylleng ki ri ka pyrthei da kaba ki shong ban trei na la ïing. Kane ka lad ai kam ai jam ka la sdang ban ïar sha ka 25,000 sq. ft. ha Shillong Technology Park bad ka dei kaba la don bynta ban ithuh ïa ka sap ka phong jong ki khynnah samla bad ruh ban pynkylla ïa ka sap kaba ki don sha kawei na ki lad trei kam kaba bha tam.
Kane ka kompani mynta ka khmih bniah ban nang sei ïa ki lad trei kam ha Meghalaya lyngba ki tnat treikam jong ka ïa kiba la tip kum ki Corporate Social Responsibility (CSR) kiba la pyntrei hapoh ka [24]7.ai Foundation. Kum shi bynta na ka jingthmu jong ka ban buh ïa ka Meghalaya ha ka Global IT/ITES map, ka kompani kan pynlut ban shna ïa ka Eco-System of Industry-ready BPO kiba don ïa ka sap kaba tbit.
Haba ïoh ban ïakren bad kawei na ki kaba trei hapoh katei ka kompani, ka samla Delphinia Dkhar, ka la ïathuh ba ka la trei hapoh ka [24]7.ai la kumba 4 snem eiei. Nyngkong eh kane ka samla ka la sdang ban trei ha ka kompani [24]7.ai kaba don ha Bangalore, hynrei ha kaba la trei hangtei ka jylla la kumba 2 snem eiei, ka la hap ban wanphai noh shapoh kane ka jylla namar ka jingwan lynshop ka khlam Covid-19.
Katei ka samla ka la pynpaw ba hadien 1 snem ba ka la wanphai shapoh kane ka jylla, ka la dap da ka jingkmen pat ban tip ba kane ka kompani [24]7.ai ka la wan ban buh ïa ka jaka treikam sa hapoh Shillong.
Ka samla Delphinia ka la pynpaw ba kaei kaba pynlong ïa ka ban sngewtynnad ban trei hapoh [24]7.ai ka long namar ba katei ka shlem treikam ka don ïa ka jingïohi jngai ban kyntiew ïa ka roi ka kiew jong ki samla bad jong ka jylla.
“Kaei kaba nga sngewtynnad shaphang ka [24]7.ai ka dei ruh namar ba kam da dei eh ban shu trei beit tang ha ka kam hynrei ngi don kiwei kiwei ki prokram”, la ong ka samla Delphinia.
Ka la ong ba kum ka nongtrei kaba trei hapoh ka [24]7.ai la kumba 4 snem eiei, ka la ïoh jinghikai shibun eh kiei kiei kiba ai jingïarap ïa ka ba kan long kumba ka long mynta.
Na ka liang kawei pat ka nongtrei kaba trei hapoh katei ka shlem treikam, ka Kong Marylyne Nongkynrih kaba dei ka Manager for Administration and Facilities ha [24]7.ai, ka la ïathuh ba ka la trei ha katei ka shlem treikam mynta la 2 snem. Ka la ong ba katei ka kompani ka la ai jingsngewsarong bad ka jingkmen ïa ka bad kaba kham kongsan eh ka dei ba ka la ïoh ban kheit ïa u soh ka jingjop hadien ba ka la ïoh ïa ka khusnam Hum Excellence Awards 2022.
Ka la ong ba kum ka kmie kaba don arngut ki khun, katei ka kompani ka ai ka por ïa ka ba kan ïoh ka lad ban trei suk bad trei bha ïa ka kam jong ka la ka long hapoh jingtrei ne ha ïing.
Ka [24]7.ai ka dei ka kompani kaba ïadei bad ka ‘Software and Services’, ka jingpyndonkam ïa ka jingstad teknoloji, ka jingstad briew bad ka jingdon bynta lang ki riew shemphang ban wanrah ïa ka jingjop bad ban pynhun ïa ki briew. Ka kompani ka la sdang ban pyntrei kam da ka AI ha ka jingïakren, ha ryngkat ka jingtrei lang ki riew shemphang kiba la trei la palat 20 snem, kaba la plie lad ban ithuh bad die ïa ki mar kiba pawnam ha ka pyrthei. Na ka bynta ka jingtip kaba kham bniah leit sha ka http://www.247.ai.
[Ka[24]7.ai ka dei ka lad ai kam jong ka [24]7.ai, Inc. Baroh kiwei ki mar, lane ka kyrteng jong kito ki mar ba dei ka dei da ka jingtip lang jong ki trai jong ki mar lane ki tiar ki tar.
