Shillong, Nailar 25
Ka Voice of the People Party (VPP) ka la ong ba ka shaniah ha ka jingstad jong ka ‘Expert Committee’ ha ban khmih bniah ïa ka bhah thung kam ne ka ‘Reservation Policy’ jong u snem 1972 bad kyrmen skhem ba ki dkhot ka komiti kin ym don ka jingshah liang haba shim ïa kano-kano ka rai.
“Ngi ai khublei ïa ka Sorkar kaba la leh ïa kaba dei. Ngi ieh ha ka jingstad jong ka komiti naba la ai por 12 bnai ïa ki dkhot ba kin khmih bniah,” la ong u General Secretary ka VPP, Dr. Ricky A.J. Syngkon ha ka Sngi Thohdieng.
Haba ban biang ba u ieh ha ka jingstad jong ka komiti, u la ong ba ki dkhot ki dei ki ’riewshemphang bad ka seng ka khmih lynti ba kin leh ïa kaba dei eh.
Haba kylli, utei u nongïalam u la ong, “Ngi hap ban burom ïa ka ‘Search Committee’ hapoh ka jingkhlieh jong u Chief Secretary ka Jylla bad ngi ieh ha ka Sorkar ïa ki dkhot kiba ka la jied. Ngi shaniah ha ka ‘Expert Committee’.”
U la bynrap ba kano-kano ka komiti kaba shim ïa kum kane ki jait kam – ki dkhot kim dei ban don ka jingshah liang haba ki shim kano-kano ka rai ne ha ka pyrkhat pyrdaiñ la ki dei ne kim dei ki trai-ri.
“Ka dei ban long kaba khuid bad kum ki ’riewshemphang ki dei ban long kiba beit ba ryntih bad ki bym shah liang,” u la ong.
Ha kajuh ka por, u la pynpaw ka jingsngewkmen ba hadien ka jingbuddien jong ka seng, ka Sorkar ka la ïaid shakhmat ban thaw ïa ka komiti bad khmih lynti ba kan leh ïa kaba dei na ka liang jong ka.
Na ka liang u General Secretary u la ïathuh ruh ba ka seng shen kan sa ïakynduh ban ïakren halor katei ka bynta.
Kum ban shu kdew hangne, ka Kynhun Myntri ka Sorkar Jylla ka la ai jingmynjur ïa ki kyrteng jong ki dkhot ka ‘Expert Committee’ na ka bynta ban khmih bniah biang ïa ka bhah thung kam ha Jylla, bad kane ka kynhun ki ‘riewshemphang kan ïoh por ban pyndep ïa ka kam kaba la bynshet hapoh 12 bnai.
Ki kyrteng kiba la mynjur ki long u nongbishar ba la shongthait ka Madhya Pradesh High Court, u Justice Moolchand Garg kum u Chairman ka komiti bad kiwei pat ki dkhot ki long u nongbishar ba la shongthait ka Allahabad High Court, u Dr. Satish Chandra, nalor kiwei pat ki dkhot – u Prof. D.V. Kumar na ka tnad pule Sociology, NEHU, Shillong (Expert Member ha ka Sociology), Prof. Chander Shekhar na ka tnad pule Fertility & Social Demography, IIPS, Mumbai (Expert Member ha ka Population Studies), bad Prof. Subhadip Mukherjee, Assistant Professor, Economics & Public Policy na IIM Shillong (Expert Member ha ka Economics).
Ka komiti kan ïoh ban peit bniah ïa ka bhah thung kam ha ryngkat ki jingbynshet kiba la ai lypa kiba hap ban pyndep hapoh 12 bnai.
Ki bynta kiba ka Expert Committee kan peit bniah ki long ban pule bniah ïa ka bhah thung kam kaba la don mynta ryngkat ki jingai jingmut ban pynbeit thymmai, ban shim ki jingmut bad jingïasyllok kiba ïar bad baroh kiba dei ki nongdon bynta, bad ka Committee kan leit jngoh ruh sha kylleng ki jaka ha Jylla ban shim ïa ki jingmut na baroh kiba don bynta.
