Shillong, Nailar 25
Ka Kynhun Myntri ka Sorkar Jylla ka la ai jingmynjur ïa ki kyrteng jong ki dkhot ka Expert Committee na ka bynta ban khmih bniah biang ïa ka bhah thungkam ha Jylla, bad kane ka kynhun ki riewshemphang kan ïoh por ban pyndep ïa ka kam kaba la bynshet hapoh 12 bnai.
Ki kyrteng kiba la mynjur ki long u nongbishar ba la shongthait ka Madhya Pradesh High Court u Justice Moolchand Garg kum u chairman ka expert committee bad kiwei pat ki dkhot ki long u nongbishar ba la shongthait ka Allahabad High Court, u Dr Satish Chandra, nalor kiwei pat ki dkhot u Prof DV Kumar, Department of Sociology, NEHU, Shillong (expert member in sociology), Prof. Chander Shekhar, Department of Fertility and Social Demography, IIPS, Mumbai (expert member in population studies), bad Prof. Subhadip Mukherjee, Assistant Professor, Economics and Public Policy, IIM Shillong (expert member in economics).
Haba kren sha ki lad pathai khubor ynda la wai ka jingïalang ka Kynhun Myntri, ka Myntri Sorkar ka Kong Ampareen Lyngdoh ka la ong ba ka Expert Committee kan ïoh ban peitbniah ïa ka bhah thungkam ha ryngkat ki jingbynshet kiba la ai lypa kiba hap ban pyndep hapoh 12 bnai.
Ki bynta kiba ka Expert Committee kan peit bniah ki long ban pule bniah ïa ka bhah thungkam kaba la don mynta ryngkat ki jingai jingmut ban pynbeit thymmai, ban shim ki jingmut bad jingïasyllok kiba ïar bad baroh kiba dei ki nongdonbynta, bad ka Committee kan leit jngoh ruh sha kylleng ki jaka ha Jylla ban shim ïa ki jingmut na baroh kiba donbynta.
Haba kylli balei khlem kynthup lang ïa ki riewshemphang kiba dei ki trai muluk, ka Kong Ampareen ka la ong ba ïa kane la leh namarba ka ju don ka jingmutdur ba kan don ka jingmih shiliang namarba ka bhah thungkam ka dei kaba donbynta lang ki jaitbynriew trai muluk.
Kum ban shu kdew hangne, ka bhah thungkam ha ka jylla ka dei kaba la bhah lang hapdeng ki Khasi & Jaiñtia bad Garo kaba long 40 la 40 bad ïa kane la pyntreikam naduh u snem 1972.
