Nongstoiñ, Nailar 27
Ka Hynñiewtrep Youths’ Council (HYC) West Khasi Hills District, ha ka Sngi Saitjaiñ ka la sam da ki shithi lyngba ka HYC Nongstoiñ, Mawshynrut, Rambrai Circle sha ki nongkhaïi dewbilat ban kyrpad ïa baroh ki nongkhaïi dewbilat kiba die hapoh ka West Khasi Hills ba kin sangeh noh ban shim bad ban die ïa ka dewbilat TOPCEM kaba la shna bad saiñdur ha East Jaiñtia Hills.
U samla Lumlang Kharsyiemlieh, President ka HYC, West Khasi Hills, u la ong ba ka jingshim jong ka HYC ïa kane ka sienjam ka long ba ka pang ka mynsiem ban ïohi ïa ki parari ki paradoh ki shah khñiot beiñ, ki shah lehbeiñ, bad ka seng kam lah ban shu sngap ïa ka jingshah shoh shah bom jong ki parari ha ki pulit lyngba ka jingkynshoit jong ki trai bad ki nongtrei jong katei ka karkhana shna dewbilat.
Nalorkata, u la ong ba ki pulit ki khlem kheiñ shuh wat ïa ki ’riew kynthei bad kiba bun kiba la mynsaw tang namar ki pyrshah ïa ka jingthmu jong kane ka kompani ban pynheh ïa kane ka karkhana shna dewbilat ïa kaba ki nongshong ki lap ba kane ka jingleh ka la ktah ïa ka jingkhuid jong ka mariang naduh ka um ka lyer lyngba ka jingdon kane ka karkhana ha kine ki snem.
Na ka liang u samla Lumlang u la pynpaw ruh da kaba ong, “Ngeit skhem lyngba ka jingkyrshan jong phi, ngi sngew ban ong ba katei ka karkhana kan nym ïoh lad shuh ban leh ba heh bad ha kajuh ka por ka pyntlot noh ïa ka jingïoh kamai ban kjit na ngi.”
U la ong ruh ba ka HYC ka buh ïa ka jingkylli ïa ka tnad pulit ha East Jaiñtia hato ki la shah pynïaid ha katei ka TOPCEM katba ong ma ki shoh ki shoh.
“Ka HYC ka kyrpad ïa ki nongkhaïi bad paidbah ka West Khasi Hills ban ym thied shuh ïa ka dewbilat TOPCEM ba ki nongpynïaid ki mut ban bam duh ïa ka jaitbynriew jong ngi ha Jaiñtia Hills,” la ong u samla Lumlang.
