Nongpoh, Nailar 28
Ka Central Agriculture University, Manipur da ka jingïatreilang bad ka National Agricultural Higher Education Project (NAHEP) ICAR, New Delhi ki la plie paidbah ïa ka jingai jinghikai kaba ar taïew lynter halor ka phang pdeng kaba la ai kyrteng ‘Natural Farming: Present Status and Future Prospects’ ha ka Lah Sngi U Blei. Ïa kane ka jingai jinghikai la pynlong ha ka College of Agriculture, Kyrdemkulai, Ri Bhoi District.
Ka jingthmu ba kongsan jong kane ka jingai jinghikai ka dei ban shimkhia ha kaba ïadei bad kumno ban wad ki lad ki lynti ban kyntiew ïa ka rukom rep jingrep ka bym ktah ïa ka mariang bad ki jingthaw ba im bad ruh kaba ai jingmyntoi na ka bynta ka koit ka khiah jong ki briew kiba pyndonkam ïa kita ki mar rep.
Ïa ka bynta kum u kongsan ha kane ka sngi, la wan ban shim da u Dr Dinesh Kulkarni uba dei u All India Organising Secretary bad uba bat ruh kum u Sangathan Mantri jong ka Bharatiya Kisan Sangh nalor kiwei pat ki kynrem ki lyndan kiba kynthup ïa u Dr Anupam Mishra, Vice Chancellor jong ka CAU, Imphal, u Prof. Dwipendra Thakuria, Dean jong ka College of Agriculture, Kyrdemkulai, u Manoj Solanki, Farmers’ Representative jong ka ICAR Governing Body, Natural Farming Practitioner, u Prof. PP. Shastry, u Dean ba la shongthait jong ka College of Agriculture, Khandwa, Madhya Pradesh, u Dr. V.K. Mishra, Director jong ka ICAR-RC, NEH Region, Umïam lem bad kiwei kiwei.
Kumba 35 ngut kiba bat ïa ka kyrdan Assistant Professor bad kham shaneng, ba kynthup na ki skulbah kum ka Odisha University of Agriculture & Technology (OUAT), Bhubaneswar; Bidhan Chandra Krishi Viswavidyalaya (BCKV), West Bengal; Assam Agricultural University (AAU), Jorhat, bad ruh na ki kolej kiba don jingïadei bad ka CAU Imphal ki la wan ban ïashim bynta ha kane ka prokram ka ban pynkut ha ka 10 tarik u Nailur, 2023.
Lyngba katei ka prokam, ki nongïashim bynta kin ïoh ïa ka jinghikai kaba bniah bad paka na ki 30 ngut ki ‘riew shemphang jong ka Ri kiba la bna nam ha kylleng ka pyrthei halor ki bynta kiba ïadei bad katei ka rukom rep rukom riang khnang ba kin lah pat ban ai jinghikai ïa kiwei pat ki samla pule halor katei ka mat kumba kawei na ki jingthmu jong ka NAHEP ban pynlong ïa kum kine ki jait prokram, ka dei ban thaw ïa kawei ka jingpule kaba thymmai kaba la tip kum ka Undergraduate Degree Programme ha ka phang Natural Farming ha baroh kawei ka Ri.
Ha kane ka sngi la ïoh ruh ban pyllait paidbah ïa ka kot lyngkdop kaba la ai kyrteng ‘Handbook on Natural Farming: Principles and Practices’ Volume 1 ka ban ai jingshai bad batai bniah halor ka rukom rep rukom riang kaba ïadei dur bad ka mariang sawdong sawkun lane kata ka ‘natural farming’.
