Tura, Nailar 28
U MDC ka GHADC na Tura bad nongïalam ka BJP, u Bernard N. Marak u la phah jingthoh sha u Myntri ka tnad ka koit ka khiah ka Sorkar Pdeng, u Dr. Mansukh L. Mandaviya – halor kaei kaba u ong ka jingshah leh bym hok, ba la ïakynduh da ki nos Garo haba ïadei bad ka jingthung kam MLHP hapoh ka Jylla.
“Ka la don ka jingleh bym hok ba la ïakynduh da ki nos Garo haba ïadei bad ka jingthung kam MLHP da ka NHM Meghalaya, ha kaba ki nos Garo kiba la bit la biang ki la shah knieh noh ïa ka hok lyngba ki mat treikam bad ka jingbym khuid ba la pyndonkam da ki bor pynïaid. Ka la wanrah ka jingsngewsih ïa ki paidbah ka Ri-lum Garo namar ka jingkyntait ïa ki jingmyntoi ba dei hok ka dei ka jingshet kylla ïa kawei ka bynta jong ka jaidbynriew. Ka jingkhang lad ïa ki nos Garo kiba la bit la biang ban ïoh rung ha ka MLHP ka la wanrah ïa ki jingsngew na kiba bun ki liang,” la ong u Bernard ha ka kyrwoh ha ka Lah Sngi U Blei.
Kaei kaba kham sngewlyngngoh na bynta utei u MDC ka long ba ïa ki kam kiba ha Ri-lum Garo, ym shym la thung ïa ki Garo, hynrei ka jingthung kam ka long beit thik na 2 tylli ki shlem ai jinghikai – Woodland Nursing Institution bad NEIGRIHMS.
“Ym shym don kano-kano ka jingpyrkhat ïa kiwei pat ki kyrtong kiba la bit la biang, ba kynthup ïa ki ‘Graduate’ na ka bhah Sorkar. La ong ruh ba ka jingdon jong ki kam ka la kiew hadien ba la pynbna ïa ka risol, ha kawei ka liang kaba la wanrah ka jingartatien halor ka jingkhuid jong ka jingthung kam,” u la bynrap ha ryngkat ka jingkyrpad ban tohkit bniah khnang ban lap ïa ka jingshisha, ha kajuh ka por, ban pynïoh ïa ka hok jong kito ki nos kiba dei hok ban ïoh ïa ka kam.
“Dei ban pynlong biang da ka jingthung kam bathymmai na bynta ka Ri-lum Garo bad kito kiba la shah jied, ha ka jaka ban pyndam, dei ban thung ïa ki ha ki jaka lajong/distrik ha kaba ki lah ban ïakren da ka ktien lajong. Namar ban trei ha ka shnong ba kyndong ha Ri-lum Garo, donkam ban nang ïa ka ktien khnang ban suk ha ka liang ka ktien ka thylliej bad ka kam kumjuh,” u la dawa.
U Bernard u la ong ruh ba ka jingpynshai ba la ai da ki bor pynïaid ka Jylla ba ki Garo kim long kiba bit ba biang na bynta ki kam, ka long ka bym shongnia bad ym lah ban pynshisha naba ki la don bun ngut ki kyrtong kiba la bit la biang napdeng ki Garo na bynta ka MLHP hapoh ki kyrdan jong ka BSc Nursing kumjuh ki GNM ‘Graduate’ namar ka ‘curriculum’ bad ki jingdonkam na bynta ka BSc Nursing ka long kumjuh.
“Haba khatduh, nga kwah ban kyrpad ïa phi ban bthah ïa ka NHM Meghalaya ban pynlong da ka jingthung kam bathymmai na bynta ka Ri-lum Garo, ha kajuh ka por, da kaba buh ïa kito kiba shah jied ha ki distrik lajong. Ban pyndam kan long ka jingleh bym hok ïa ki kyrtong ba lui-lui, hynrei ka jingthung kam bathymmai kan long ka lynti kaba biang eh na bynta ki kyrtong Garo. Kumta nga kyrpad rit ïa phi ba phin shimkhia lem ïa kine ki jingpynsngew na bynta ka bha ka miat jong ki lai tylli ki jaidbynriew ka Meghalaya. Ngan ïai ap ïa ka jubab jong phi bad kyrmen ïa ki lynti jong ki sienjam ba mardor,” la ong u MDC ka Tura ha ka kyrwoh sha u Myntri.
