Jowai, Jylliew 19
U Myntri ka tnad koit ka khiah ka Jylla, u Bah Wailadmiki Shylla ha ka Sngi Thohdieng u la shim bynta ha ka ‘International Day of Yoga’ ba la pynlong da ka District Ayush Society ha Khimusniang Indoor Hall, Jowai halor ka phang “Yoga for Healthy Aging.”
U Myntri ha ka jingkren u la ban jur halor ka jingnang kiew ka jingdonkam jong ka ‘Yoga’ ha kane ka juk kaba mynta. U la kdew ba ka ‘Yoga’ ka la ïoh ïa ka jingithuh ha baroh ki bynta jong ka imlang-sahlang namar ka jingmyntoi na ka bynta ka jingkoit jingkhiah ha ka met bad ka bor jabieng. U la pynpaw ba ka jingleh ‘Yoga’ man ka por ka ïarap ïa kiba bun ki briew, ka pynlait na ka jingkhuslai, ka pynbha ïa ka koit ka khiah bad ka pynduna ïa ka jingma na ki jingpang bapher-bapher.
Haba khot ïa ki samla pule ban shimkhia ban kyntiew ïa ka rukom im kaba koit ba khiah, u Myntri u la kyntu ban long kum ki nongrah khubor jong ka ‘Yoga’ bad ban pynphriang ïa ka jingtip shaphang ka jingmyntoi hapdeng ki paralok bad ki shnong ki thaw jong ki.
Ka DMHO, Dr. P. Shylla ka la pynpaw ïa ka jingkordor jong ka ‘Yoga’ kum ka jing ai jong ka India sha ka pyrthei bad ban jur ïa ka jingdonkam kaba nangroi ha kaba ïakhun pyrshah ïa ka jingkhuslai bad ki jingpang kiba ïadei bad ka rukom im.
Ka la pynshlur ruh ïa ki samla pule ban pynlong ïa ka ‘Yoga’ kum shi bynta jong ka jingim ba man ka sngi jong ki bad ban pynphriang ïa ka jingtip shaphang ki jingmyntoi jong ka.
Katba ka Dr. Bonnie T. Hinge ka la pynleit jingmut halor ka bynta jong ka ‘Yoga’ ha ka ban kyntiew ïa ka jingkoit jingkhiah ha ka met, ka jingkoit jingkhiah ha ka bor pyrkhat bad ka rukom im kaba koit ba khiah.
