Shillong, Jylliew 19
Ka kynhun ki nongshet ja skul ka Jylla ha ka Sngi Thohdieng ki la pynpaw ïa ka jingbitar halor ka jingbym sngap ka Sorkar ïa ka jingdawa jong ki ban kyntiew noh ïa ka tulop kaba long tang T.900 sha ka T.9000 da kaba kdew ba ki mar bam bad ki jingdonkam ki la kiew dor.
Haba kren sha ki nongthoh khubor ha ka Sngi Thohdieng ka President jong ka Union of Cook cum Helpers PM POSHAN, Meghalaya, ka Kong Gina Nengnong ka la ïathuh ba kane jingdawa jong ki ka dei kaba la neh bun snem bad pynpaw ba dang shen ki dang dep ban phah jingthoh sha u Myntri Rangbahduh ka Ri u Narendra Modi, kynthup ruh ïa u Myntri Sorkar Pdeng u ba khmih ïa ka kam pule puthi u Dharmendra Pradhan bad sha u Secretary ka tnad pule puthi u Sanjay Kumar, hynrei haduh mynta ki khlem shym la ai kano-kano ka jubab.
Shuh-shuh ka la ïathuh ba ka kynhun ka la phah ktien sha ka Myntri ka Sorkar Pdeng ka Nirmala Sitharaman ba kin ïoh ïakynduh ha ka jingwan jong ka ha nongbah Shillong, hynrei ka kynhun kam shym la ïoh ktien eiei halor kane.
Ka Kong Gina ka la ïathuh ba ki nongshet ja skul mynta ki ïoh tulop T.2000 tyngka shi bnai bad tang 10 bnai ha ka shi snem, kata T.900 ka dei kaba wan na ka Sorkar Pdeng bad T.1,100 ka dei kaba wan na ka Sorkar Jylla.
Ka la ïathuh ba kane ka jingsiew jong ki ka dei kaba la neh mynta jan ar phew snem khlem pynkiew bad pynpaw na ka por sha ka por ki ju pynsngew sha ka Sorkar ba kan pynkiew ïa kane ka jingsiew kaba wan na ka Sokar Pdeng, hynrei haduh mynta ka khlem don kano-kano ka dak kaba bha na ka bynta jong ki, kumta ka kynhun ka la pynpaw ïa ka jingsngewkhia namar kane ka jingsiew kam ïahap shuh bad kane ka juk kaba ki mar bam mardih bad kiwei-kiwei ki jingdonkam ki la kiewdor, ha kaba kim lah shuh ban pyndap ïa ki jingdonkam jong ki.
Namar kata ka kynhun ka buh ka jingkyrpad kaba khatduh sha ka Sorkar Pdeng ba kan sngew kan sngap ïa ka jingkyrpad jong ki bad pynpaw ïa ka jingbitar ba lada ka Sorkar Pdeng kam leh eiei lane pynkiew ïa kane ka tulop jong ki, ki la ong, “Ka bha ba ka Sorkar kan pynduh pyndam noh ïa kane ka skhim, namar kim kwah ban mih surok ban pynthud ïa ka ïaid ka ïeng jong kiwei.”
