Shillong, Jylliew 19:
U Bah Winston Tony Lyngdoh uba dei u Chief Executive Member ka KHADC u la pyntip ba ka Executive Committee ka la ïoh ban pynlut haduh lai lak sawphew hynñiew tyngka jong u snem 2025-2026 ban ïarap sha ki 47 tylli ki ïing kiba la shah pynjulor ha ka mariang.
Kane ka jingjubab u Bah Winston ka dei ha ka kynta kylli jingkylli ba la wanrah da u MDC ka UDP na Mairang Bah Equator L. Nongrang uba la buh jingkylli ïa ka jingslem ban mang pisa ban ïarap ïa ki briew kiba shah ktah ha ka mariang.
U Bah Winston u la ong ba ïa u snem 2026-27 um pat mang pisa namar ka dang ïaid tang ka Vote on Account ban siew tulop ïa ki nongtrei hynrei mar shu dep kane ka mang tyngka kaba pura un sa mang pisa ban pyllait ïa kito ki longïing kiba la shah pynjulor kiba la dep phah jingtyrwa.
U la ïathuh ba lada don ka pisa shisien ba la phah ïa ka jingtyrwa ka Council ka la pyllait ïa ka pisa hapoh shiphew sngi.
U la ïathuh biang ba ka Council ka ai jingïarap saw hajar kawei ka longïing kaba shah ktah ha ka mariang bad kiba la mad ka jingshah ktah kaba jur ka jingïarap ka la poi haduh khadsan hajar tyngka.
Haba phai pat ha kawei ka khubor, ki MDC ka Voice of the People Party ki la ai jingïaroh ïa ka Executive Committee kaba la shim ïa ka rai rangbah ban pynkiew tulop ïa ki nongtrei Casual kiba la trei la 12 snem kiba ju ïoh tang san hajar tyngka shi bnai hynrei mynta la pynkiew sha ka shiphew hajar tyngka shi bnai kaba la pynkmen ïa ka mynsiem jong ki haba ki wan trei sha ophis.
Kane ka jingïohlad ki MDC ka VPP ban kren ha ïingdorbar ka dei ha ka jingïatai kyllum ïa ka mang tyngka jong u snem 2026-27 ba la wanrah da u Bah Seiborlang Warbah uba dei u EM ba dei peit ïa ka tnad pla tyngka.
Kine ki MDC ka VPP kiba la ïoh ban ai jingkren ki long u Bah Mathew Keneth Makdoh u MDC shu sieh, Bah Eddieson Kharumnuid u MDC na Mawlai, Dr.Juristman Iawphniaw u MDC na Nongstoin.
U Dr. Juristman Iawphniaw u la pyntip ba ka long ka jingsngewsynei ban tip ba ki nongtrei Casual kiba la trei palat 12 snem ki dang ïoh jingsiew tang san hajar tyngka hynrei mynta naduh ba synshar ka VPP la pynkiew sha ka shiphew hajar tyngka.
U la ong ba ka jingïarap sha ki paidbah lyngba ki MDC ka dei tang Ar lak tyngka hynrei mynta la pynkiew sha ka Lai lak tyngka.
U la ong biang ba ka jingïarap sha ki skul ka long tang hynñiewphew ar hajar tyngka ïa uwei u MDC kaba la ju phiah tang ar tylli ki skul hynrei mynta la pynkiew sha ka shi lak tyngka kaba la ïoh ban ai jingïarap mar sanphew hajar tyngka kawei ka skul.
