Shillong, Jylliew 19
Ki bor ba dei peit ka Jylla ki la pyndep ïa ka jingkhmih bniah haba ïadei bad ka jingpynkhreh na ka bynta ka eksamin NEET-UG, 2026 kaba la pynbeit thymmai, ha kaba 4,164 ngut ki kyrtong kin ïakhun ïa kane ka eksamin ha ki 14 tylli ki jaka thoh eksam ha kylleng ka Jylla.
Kane ka eksamin kan long biang ha ka Sngi U Blei, 21 tarik u Jylliew.
Ka jingïalang ‘High-Level’ ba la pynïaid da u Secretary ka tnad ka koit ka khiah, Bah B. Mawlong ka la long ha ka Sngi Thohdieng ha Committee Room-III, Additional Secretariat Building, Shillong.
Kane ka jingïalang khmih bniah ka la pynleit jingmut halor ki lad jingïada, ka jingpynbiang ïa ki jingdonkam bad ka jingïatreilang na ka bynta kane ka eksamin ka ban pynlong da ka National Testing Agency.
U Bah Mawlong u la khmih bniah ïa ki lad jingpynbeit ba la leh da ki bor distrik kiba don ïa ki jaka thoh eksam bad u la kyrpad na ka bynta ka eksamin “kaba suk ba saiñ, kaba shngaiñ bad kaba lait na kino-kino ki jingpynthut”.
U la kyntu ruh ïa baroh ki tnad bad ki ‘agency’ ban don ka jingïatreilang kaba ïajan khnang ba ki kyrtong kin ïoh ïa ka jinglong-jingman kaba biang bad kaba khlem kino-kino ki jingeh.
Na ka liang ki heh ophisar ka distrik, ki la pyntip sha u Shongknor halor ki lad ki lynti kiba la pynbeit, kynthup ka jingpynkhreh ïa ki bor pahara, ki lad ha ka liang ka leit ka wan na ka bynta ki samla pule, ka jingpynbiang bording ba khlem jingthut, nalor kiwei-kiwei.
Ka Meghalaya ka don haduh 14 tylli ki ‘NEET-UG Centre’: 10 tylli ha Shillong, 2 tylli ha Tura, kawei ha Jowai, bad kawei ha North Eastern Police Academy Campus hajan Umïam, Ri-Bhoi District.
Ha kane ka jingïalang la don lang u Dr. S. Rajan, Deputy Secretary ka tnad pule-puthi ka Sorkar Pdeng; Dr. R. Marak, MCS, Joint Secretary ka tnad ka koit ka khiah ka Jylla; bad ki heh ophisar na ki bor distrik bad ki tnad treikam ba dei khmih.
