Tura, Nailar 29
U Myntri ka tnad Animal Husbandry & Veterinary, Bah A. L. Hek ha ka Sngi Ba-ar u la ïashim bynta ha kiba bun tylli ki jingïalang bad ki ophisar ka tnad halor ki mat bapher-bapher kumjuh ki thong ba la kynjoh da ki pham bad shnat treikam jong ka tnad.
Na ka liang ki ophisar ki la pynsngew ruh halor ki jingeh ba ïakynduh ha ki pham bapher-bapher kiba don ha Ri-lum Garo.
Kum shi bynta jong kane ka jingleit jngoh, u Myntri u la jurip ruh ïa ki pham Sorkar bapher-bapher kumjuh ïa kiwei-kiwei ki shnat treikam jong ka tnad.
U Bah Hek ha ryngkat ka jingdonlang u Secretary, AH & Veterinary, Dr. C. Manjunathan, IFS, Deputy Commissioner ka West Garo Hills, J. Chelani, IAS, BDO ka Rongram, T.N. Sangma, MCS, Director, AH&V, Dr. R. Ch. Momin, AHP, Garo Hills, Dr. H.K. Marak, nalor kiwei-kiwei u la aiti ïa ki shabi jong ki 2 tylli ki thuk-thuk ba la mang hapoh ka Rashtriya Gokul Mission (RGM) na bynta ka ‘Batch’ ba nyngkong jong ka MAITRI’s (Private AI Worker) khnang ban ïarap ïa ki ha ka ban pynbiang ïa ka por haba ïadei bad ka Artificial Insemination (AI) ha khmat jingkhang jong ki nongrep.
Na ka liang u Myntri u la plie ruh ïa ka ‘Milk Parlour’ kaba la kyrshan pisa lyngba ka Meghalaya Milk Mission & National Programme for Dairy Development ha New Dairy Complex, Ganol bad Worker’s Amenity Block ba la kyrshan pisa hapoh ka National Programme for Dairy Development, West Garo Hills ha katei kajuh ka jaka.
