Khliehriat, Nailar 29
Ka kompeni Meghalaya Cement Limited, Topcem ha ka Sngi Ba-ar ka la weng kam noh shi syndon ïa ki 2 ngut ki nongtrei kiba kren da ki ktien khlem akor bad kiba la pynshit ïa ki pulit ban bom naphang ïa ki paidbah ha ka jingpynlong ïa ka jingpynsngew paidbah jong ka kompeni dewbilat kaba la long ha ka shnong Thangskai ha ka 24 tarik mynta u bnai.
Kitei 2 ngut ki nongtrei kiba la shah weng kam noh bad kiba trei kum ki Administrative Officer hapoh jong katei ka kompeni ki kynthup ïa u Arun Kejriwal bad u Umesh Kumar.
Na ka liang ka HR Department ka Meghalaya Cements Limited ka pyntip ba ka la pynmih ïa ka hukum ha ka Sngi Ba-ar ba la weng kam noh shi syndon ïa kitei 2 ngut ki nongtrei jong ka kompeni.
